- रविंद्र गायकवाड

बिडकिन - येथील ग्रामीण रुग्णालय ६२ वर्षीय वयोवृद्ध महिलेला तब्बल दोन तास रुग्णवाहिका सेवा न मिळाल्याने खासगी रुग्णवाहिकेतून उपचारासाठी पुढे हलविण्यात आल्याची घटना काल (ता.२२) रोजी अंदाजे ०७ ते ७:३० या वेळेत घडली.

बिडकिन येथील आलिया अब्दुल्ला चाऊस (वय-६२ वर्षे), रा. चाऊस गल्ली, बिडकिन. ता.पैठण असे रुग्ण वयोवृद्ध महिलेचे नाव आहे. ग्रामीण रुग्णालयात अति उच्च रक्तदाब आणि तीव्र मधुमेह आजाराची तीव्रता वाढली असल्याने दाखल करण्यात आले होते. वैद्यकीय अधिकारी यांनी रुग्ण चाऊस या वयोवृद्ध महिलेला प्रथमोपचार करून पुढील उपचारासाठी छत्रपती संभाजीनगर येथील शासकीय रुग्णालयात दाखल करण्यात यावे, असा सल्ला दिला होता.

ग्रामीण रुग्णालयातील रूग्णांसोबत असलेल्या नातेवाईकांच्या वतीने तब्बल दोन तास रुग्णवाहिका सेवा १०८ ला वारंवार फोन केला होता. परंतु रुग्णवाहिका सेवा टोल फ्री क्रमांक १०८ ही सेवा कधी नॉट रिचेबल, कधी संपर्क क्षेत्राच्या बाहेर, कधी फोन उचलुन बाजुला ठेवणे, कधी फोन लागत नसल्याचे ही नातेवाईकांच्या वतीने सांगण्यात आले आहे.

तब्बल दोन तास रुग्णवाहिका सेवा न मिळाल्याने परिसरातील खासगी रुग्णालयांमध्ये असलेल्या रुग्णवाहिकेतून पुढिल उपचारासाठी छत्रपती संभाजीनगर येथील शासकीय रुग्णालयात दाखल करण्यात आले असल्याचा धक्कादायक प्रकार समोर आला आहे.

कधी काळ अंत्यत तातडीने सेवा मिळत असलेल्या १०८ रुग्णवाहिका सेवा हा भोंगळ कारभारामुळे अनेक प्रश्न निर्माण होताना दिसत आहे. तसेच रुग्णांच्या जीवाशी खेळ खेळण्याचे काम हि सूरु आहे असे नातेवाईकांच्या वतीने सांगण्यात आले आहे.

रुग्णवाहिका सेवा क्रमांक १०८ च्या वरिष्ठ अधिकारी, रुग्णवाहिका टॉल फ्री क्रमांक सेवा, रुग्णवाहिका चालक आणि रूग्णवाहिका वैद्यकीय अधिकारी यांच्यावर कार्यवाही करण्यात यावी, अशी मागणी रुग्ण व नातेवाईक आणि नागरिकांच्या वतीने केली जात आहे.