लातूर ः महापालिकेने वीज बील न भरल्याने लातूरला पाणी पुरवठा करणाऱया सर्वच योजनेचा पाणीपुरवठा योजनेची वीज महावितरणन तोडली आहे. याला आता सात दिवस होत आहेत. सध्या शहराला दहा दिवसांतून एकदा पाणीपुरवठा केला जात आहे. त्यात ही सात दिवस वीज तोडल्याने सतरा दिवसांपासून शहरात निर्जळी आहे. महापालिकेतील विरोधी पक्ष असलेल्या भारतीय जनता पक्षाला सोमवारी (ता.२४) जाग आली. महापालिकेने तातडीने पाणीपुरवठा सुरु करावा या मागणीसाठी त्यांनी सोमवारी महापालिकेसमोर ठिय्या आंदोलन केले. त्यात उपायुक्त संभाजी वाघमारे यांनी नागरिक कर भरणा करीत नसल्याने वीज भरले गेले नाही अशी माहिती दिल्यानंतर भाजपचे नगरसेवक संतप्त झाले होते.

महापालिकेकडे पाणीपुरवठा योजनेची कोट्यावधी रुपयांची थकबाकी आहे. गेल्या काही महिन्यापासून चालू बीलही महापालिकेने भरलेले नाही. त्याचा परिणाम ता.१८ फेब्रुवारी रोजी महावितरणने पाणी पुरवठ्याच्या सर्वच योजनाची वीज तोडली आहे. मांजरा धरणात मृतसाठ्यात अत्यल्प पाणीसाठा असल्याने दहा दिवसांतून एकदा पाणी पुरवठा केला जात आहे. त्यात वीज तोडल्याने गेल्या सतरा दिवसांपासून शहरात निर्जळी आहे. महापालिकेने तातडीने पाणीपुरवठा सुरु करावा या मागणीसाठी भाजपच्या नगरसेवक व काही कार्यकर्त्यांनी सोमवारी महापालिकेसमोर ठिय्या आंदोलन केले. नगरसेवक व शहराध्यक्ष गुरुनाथ मगे यांच्या नेतृत्वाखाली हे आंदोलन करण्यात आले. यात सभागृह नेता ॲड. शैलेश गोजमगुंडे, स्थायी समितीचे सभापती ॲड. दीपक मठपती, शैलेश स्वामी, अजितसिंह पाटील कव्हेकर, रागिणी यादव, मंगेश बिराजदार आदी सहभागी झाले होते.

हेही वाचा  ः  लातुरकरांवर पाण्याचे संकट, महापालिकेकडे वीजबिलासाठी पैसे नाही

नागरिक पैसे भरत नाहीत, आमच्याकडे पैसे नाहीत म्हणून वीज बील भरले जात नाही, असे अधिकारी सांगत आहेत. पण गेल्या तीन महिन्यात किती कंत्राटदारांची बिले दिली, कोणत्या कॅबिनवर किती खर्च केला याचा आढावा घेतला तर चार वेळा वीज बील भरू शकलो असतो. जाणीवपूर्वक टंचाईची परिस्थिती निर्माण केली आहे. टँकर लॉबीला मजबूत करण्यासाठी प्रयत्न सुरु आहे. महापालिकेतील काँग्रेस प्रशासनाचा धिक्कार असो. चोवीस तासात पाणीपुरवठा सुरु केला नाही तर जनआंदोलन करू हे जलआंदोलन असेल. यातून लातूर पेटले तर याची जबाबदारी प्रशासनावर असेल.
ॲड. शैलेश गोजमगुंडे, सभागृह नेता, महापालिका