परळी वैजनाथ : शहर व परिसरात मोठ्या प्रमाणावर वीटभट्ट्या असून दोन वर्षांपासून येथील औष्णिक विद्युत केंद्रातील राखेच्या कमतरतेमुळे काही वीटभट्ट्या बंद पडल्या आहेत. तर आणखीनही मोठ्या संख्येने वीटभट्ट्या सुरू असल्याचे दिसून येत आहे. नुकतेच उद्योगमंत्री उदय सामंत यांनी मंत्री धनंजय मुंडे यांच्या मागणीनुसार वीटभट्टी व रेशीम क्लस्टरला तत्त्वतः मान्यता दिली आहे. यामुळे शहर व परिसरातील वीटभट्ट्या, येथील कार्यरत हजारो मजूर आणि त्यांच्यावर विसंबून असलेल्या बाजारपेठेला याचा फायदा होईल, अशी अपेक्षा आहे.

येथील औष्णिक वीजनिर्मिती केंद्रामध्ये हजारो टन राख तयार होते. सुरवातीला या राखेचे काय करायचे, हा प्रश्न निर्माण झाला होता. ही राख अगोदर तळ्यात पाण्याद्वारे सोडली जात असे. तळ्यातील पाणी संपल्यानंतर हवेतील प्रदूषणात वाढ होवू लागली. हवेतील प्रदूषण कमी करण्यासाठी विद्युत निर्मिती केंद्राच्या परिसरात वृक्षारोपण करण्यात आले. राखेचा वापर सिमेंट निर्मितीसाठी होवू लागला.

या औष्णिक विद्युत निर्मिती केंद्रातून राख टँकरद्वारे वाहून नेली जात असे. तर औष्णिक विद्युत निर्मिती केंद्राकडून वीटभट्टीसाठी मातीसोबत काही प्रमाणात राखेचा वापर करण्यासाठी प्रोत्साहन देण्यात आले. व राख वीटभट्टीसाठी मोफत देण्यात आली. यामुळे राखेचा वापर वीटभट्ट्यांसाठी होवू लागला.

हळूहळू वीटभट्ट्यांची संख्या विद्युत निर्मिती केंद्राच्या परिसरात वाढू लागली. यातून मोठा फायदा होतोय लक्षात आल्यानंतर तालुक्यात वीटभट्ट्यांची संख्या ६०० ते ८०० झाली आहे. एका वीटभट्टीसाठी जवळपास तीसपेक्षा अधिक मजूर लागतात. हे मजूर आपल्या परिवारासह वीटभट्ट्यांवर राहतात. परिवारातील सर्वांनाच रोजगार मिळतो. यामुळे येथील बाजारपेठेला चांगली चालना मिळाली.