सेलू - सेलू तालुक्यातील मोरेगाव येथील मोरेश्वर मंदीरात जेवणाची पंगत चालू असताना शेत जमीनच्या वादातून मोठ्या भावाने सख्ख्या लहान भावावर धारदार शस्त्राचे वार करीत खून केल्याची घटना सोमवारी (ता. २९) रोजी रात्री सात ते आठच्या दरम्यान घडली.

या हल्ल्यात लहान भावाचा मृत्यू झाला असून आरोपीला पोलिसांनी अटक केली आहे. मधुकर मारोतराव मगर (वय-३८ वर्षे, रा. मोरेगाव) असे मृताचे नाव आहे. याप्रकरणी मृताची पत्नी अलका मधुकर मगर (वय-३१ वर्षे ) यांनी फिर्याद दिली‌. आरोपी राजेभाऊ उर्फ अशोक मगर याने मृताच्या गळ्यावर, डाव्या पायावर, तोंडावर, छातीच्या डाव्या बाजुस चाकुने हल्ला करुन त्याचा खून केला आहे. असे फिर्यादीत म्हटले आहे.

यावरुन आरोपी राजेभाऊ ऊर्फ अशोक मारोतराव मगर (वय-४३ वर्षे, रा. मोरेगाव) याच्यावर मंगळवारी (ता. ३०) सेलू पोलिसांत गुन्हा दाखल झाला आहे. जमीन परत घेतल्याच्या कारणावरून दोन्ही भावांमध्ये वाद होता, असे समजते. घटनेनंतर पोलिस उपविभागीय अधिकारी सुनील ओव्हाळ, पोलिस निरीक्षक दिपक बोरसे, सहायक पोलिस निरीक्षक संजय चव्हाण यांनी घटनास्थळी भेट दिली. या घटनेचा तपास पोलिस उपनिरीक्षक अशोक जटाळ करीत आहेत.