परभणी : विशेष दुष्काळ जाहीर करावा,भारनियमन रद्द करावे आदी मागण्यांसाठी राष्ट्रवादी महिला कॉंग्रेसच्यावतीने सोमवारी (ता. 22) जिल्हाधिकारी कार्यालयावर बैलगाडी मोर्चा काढून जवाब दो आंदोलन करण्यात आले.

राष्ट्रवादी महिला कॉंग्रेसच्या राष्ट्रीय अध्यक्षा माजी राज्यमंत्री फौजिया खान यांच्या नेतृवात हे आंदोलन झाले. जिंतूर रस्त्यावरील ज्ञानोपासक महाविद्यालयाच्या मैदानावरुन निघालेला मोर्चा मोंढा, गव्हाणे चौक, नारायण चाळ, स्टेशन रस्त्याने जिल्हाधिकारी कार्यालयावर धडकला. बैल गाडीमध्ये महिला कार्यकर्त्या घोषणाबाजी करत सहभागी झाल्या होत्या. जिल्ह्यात दुष्काळ जाहीर करावा, सरसकट कर्जमाफी जाहीर करावी, इंधन दरवाढ कमी करावी अशा विविध मागण्यांचे निवेदन जिल्हाधिकारी कार्यालयामार्फत मुख्यमंत्र्यांना पाठवण्यात आले. आंदोलनात राष्ट्रीय सचिव सोनाली देशमुख, महिला जिल्हाध्यक्षा भावना नखाते, शहर जिल्हाध्यक्षा नंदा राठोड आदींचा सहभाग होता.