लातूर : राज्यभरात रेल्वे मंत्रालयातर्फे विद्युतीकरणाचे काम वेगात सुरु असून मध्य रेल्वेने आघाडी घेतली आहे. आतापर्यंत साडेतीन हजार रुट किलोमीटर विद्युतीकरणाचे काम पूर्ण झाले आहे. लातूर ते पांगरी हे १३१ रुट किलोमीटर, नवीन झालेल्या अहमदनगर ते आष्टी मार्गाचे विद्युतीकरण पूर्ण होताच मध्य रेल्वेचे राज्यभरातील हे काम पूर्ण होणार आहे. या सर्व मार्गांवरून गेली अनेक वर्षे सुरु असलेली डिझेलवरची रेल्वे बंद होणार आहे. बचतीसोबतच पर्यावरणाच्या दृष्टीने हे एक महत्त्वाचे पाऊल ठरणार आहे.

देशभरात ठिकठिकाणी अनेक रेल्वे डिझेलवर धावत आहे. डिझेलच्या वाढत्या किमतीचा रेल्वेला फटका बसत आहे. त्यामुळे विद्युतीकरणावर भर दिला जात आहे. राज्यात मध्य, दक्षिण मध्य, पश्चिम, तसेच कोकण रेल्वेतर्फे ही कामे हाती घेण्यात आली आहेत. यात सर्वाधिक कामे मध्य रेल्वेकडे आहेत. मध्य रेल्वेने ती गतीने पूर्ण केली आहेत. आतापर्यंत राज्यात साडेतीन हजार रुट किलोमीटरचे विद्युतीकरण पूर्ण केले आहे. लातूर ते पांगरी (१३१ रुट किलोमीटर) आणि अहमदनगर - आष्टी (६६ रुट किलोमीटर) या मार्गांचा अपवाद सोडला तर राज्यात मध्य रेल्वेकडे असलेली सर्व मार्गावरील विद्युतीकरणाची कामे पूर्ण झाली आहेत. लातूर- पांगरी मार्गावरचे काम प्रगतिपथावर आहे. ही दोन कामे पूर्ण होताच राज्यभरातील मध्य रेल्वेच्या मार्गावरील गाड्या वीजेवरच्या असतील.

राज्यभरात मध्य रेल्वेकडून साडेतीन हजार रुट किलोमीटरचे विद्युतीकरण पूर्ण झाले आहे. लातूर- पांगरी मार्गावरचे काम प्रगतिपथावर आहे. अहमदनगर- आष्टी मार्गाचे कामही लवकरच सुरु होईल. मार्चअखेरपर्यंत ही सर्व कामे पूर्ण होतील. कामे पूर्ण झालेल्या मार्गांवरून विजेवरील रेल्वे धावेल. यातून रेल्वे विभागाचे बचत होण्यासह प्रदूषणही टळणार आहे.

शिवाजी सुतार, मुख्य जनसंपर्क अधिकारी, मध्य रेल्वे, मुंबई