चाकूर (लातूर): ओबीसीचे राजकीय आरक्षण रद्द झाल्याच्या निषेधार्थ भारतीय जनता पक्षाच्या वतीने शहरातील लातूर - नांदेड महामार्गावर शनिवारी (ता.२६) तब्बल दोन तास चक्का जाम आंदोलन केले. यामुळे रस्त्याच्या दुतर्फा वाहनांच्या लांबचलांब रांगा लागल्या होत्या. स्थानिक स्वराज्य संस्थेच्या निवडणुकीसाठी ओबीसीचे राजकीय आरक्षण कायम ठेवावे राज्य शासनाच्या नाकर्तेपणाच्या भूमिकेमुळे ओबीसी व मराठा आरक्षण रद्द होण्याची नामुष्की ओढवली आहे.

याचा निषेध नोंदवून आंदोलकांनी आघाडी सरकारच्या विरोधात घोषणाबाजी केली. सकाळी साडे दहा पासून साडे बारा वाजेपर्यंत हे आंदोलन चालल्यामुळे रस्त्याच्या दुतर्फा वाहनांच्या लांबच लांब रांगा लागल्या होत्या, पोलिसांनी एसटी महामंडळाच्या बस बसस्थानकात थांबविल्या होत्या यामुळे प्रवाशांची तांराबळ उडाली. विविध मागण्याचे निवेदन तहसीलदार डाॅ. शिवानंद बिडवे यांना देण्यात आले.

या आंदोलनात भाजपचे प्रदेश उपाध्यक्ष विनायकराव पाटील, प्रदेश प्रवक्ते गणेश हाके, जिल्हा उपाध्यक्ष बालाजी पाटील चाकूरकर, वसंतराव डिगोळे, सभापती रोहीदास वाघमारे, जमुनाबाई बडे, नितीन रेड्डी, सज्जन लोणावळे, शिवाजी बैनगिरे, प्रशांत पाटील, अशोक चिंते, लता मुंडे, धनश्री अर्जुने, अॅड. संतोष माने, हाकानी सौदागर, प्रशांत बिबराळे आदी सहभागी झाले होते.