औरंगाबाद : आर. एल. स्टील ॲण्ड एनर्जी या कंपनीच्या संचालकांच्या नावाचा बनावट मेल आयडी तयार करुन त्याद्वारे बॅंकेतून भामट्यांनी स्वतःच्या नावावर पैसे वळती करुन तब्बल ३६ लाख १२ हजार २८७ रुपयांचा गंडा घातला होता.

याप्रकरणी सायबर पोलिसांनी लखनौमधून एकाला अटक करुन आणले आहे. अजय रामनाथ सिंग (५०) असे त्याचे नाव असून त्याच्‍याकडून धक्कादायक माहिती समोर आली आहे. आरोपी अजय हा लेबर कॉन्ट्रक्टर असून फ्रॉड करुन ऑनलाईन मिळविलेला पैसा हा लेबरच्या खात्यावर वळती केल्याची माहिती समोर आली आहे.

याप्रकरणा गुन्हा दाखल होताच याआधीच दोन आरोपीना अटक करण्यात आलेली आहे. मात्र हा आरोपी फरार होता. अखेर याचा पत्ता लागल्यानंतर सायबर पोलिसांनी रातोरात लखनौ गाठत याला अटक केली.

लेबरच्या नावे खाते काढून त्यावर मागवायचा पैसे

आरोपी याला १४ जून रोजी न्यायालयात हजर करण्यात आले असता न्यायालयाने आरोपीला १९ जूनपर्यंत पोलिस कोठडीत ठेवण्याचे आदेश दिले आहेत. आरोपी अजय हा केवळ १२ वीपर्यंत शिकलेला असला तरी सायबर गुन्हेगारांच्या सावलीखाली वाढल्याने सायबर फ्रॉड करुन पैसे मिळविणे त्याला चांगलेच माहिती आहे.

पोलिस कोठडीदरम्यान धक्कादायक माहिती समोर आली आहे, ती म्हणजे आरोपी अजय हा स्वतः लेबर कॉन्ट्रक्टर आहे. तो विविध ठिकाणी लेबर पुरविण्याचे काम करतो, इतकेच नव्हे तर लेबरच्या कागदपत्रांच्या आधारे राष्ट्रीयीकृत बॅंकांत मोठी रक्कम भरुन लेबरची चालू खाते (करंट अकाऊंट) उघडली आहेत.

लेबरच्या नावाने काढलेली बॅंक खात्याचा तपशील, एटीएम कार्ड, पासबुक, चेकबुक आदि साहित्य, दस्तावेज हा सदर लेबरला न देता आरोपी हा स्वतःकडे घेऊन ठेवत असे. आणि सायबर फसवणूक करताना समोरील व्यक्तीला लेबरच्या नावचे खाते क्रमांक देत असे. यामधून आजवर आरोपी अजय याने लाखो रुपये कमविले आहेत. हाच आकडा कोटींमध्ये जाण्याची शक्यता पोलिस सुत्रांनी वर्तविली आहे.

काय आहे प्रकरण

आरोपींनी आर. एल. स्टील ॲण्ड एनर्जी कंपनीचे संचालक नितीन गुप्ता यांच्या नावाचा बनावट मेल आयडी तयार केला होता. एका आरोपीने आपणच गुप्ता असल्याचे भासवून कंपनीचे खाते असलेल्या सिडकोतील पंजाब नॅशनल बॅंकेच्या मॅनेजरला बनावट तयार केलेल्या मेलद्वारे तिघांचे बॅंक खाते क्रमांक देत त्याच्या खात्यावर कंपनीच्या खात्यातून ३६ लाख १२ हजार २८७ रुपये आरटीजीएसद्वारे पाठविण्याचे सांगितले.

त्यानुसार बॅंकेकडून चारही आरोपींच्या खात्यावर ऑनलाईन पैसे पाठविले. त्यानंतर २२ सप्टेंबर २०२१ रोजी हा प्रकार उघडकीस आला होता.