औराद शहाजानी - जलयुक्त शिवारमधून जलसंधारणासाठी मुख्यमंत्री देवेंद्र फडणवीस यांनी दत्तक घेतलेल्या हलगरा (ता. निलंगा) गावातही पाण्याचे दुर्भिक्ष जाणवत आहे. दुष्काळामुळे गावात घागरभर पाण्यासाठी ग्रामस्थांना तासन्‌तास प्रतीक्षा करावी लागत आहे. टॅंकरचे पाणी आडातून शेंदून घेताना सर्वांना तारेवरची कसरत करावी लागत आहे.

दहा हजार लोकसंख्येच्या गावाला तेरणा नदीपात्रातून पाणी योजना असून ही योजना सात वर्षांपासून बंद आहे. सध्या गावातील ३६ पैकी केवळ दोन छोट्या टाक्‍यांतून पाणीपुरवठा सुरू आहे. २१ पैकी एका विंधन विहिरीला पाणी असून ही विंधन विहीर काही तास पाणी देते. अकरा हातपंप बंद असून आठ जुने बांधकाम केलेले आडही बंद पडल्याने गावाला पाण्याचा स्रोतच उरला नाही. यामुळे गावाला टॅंकरने पाणीपुरवठा करण्यात येत असून एका टॅंकरचे पाणी तीन आडांमध्ये दर तीन दिवसाला टाकण्यात येत आहे. यामुळे आडातील पाणी शेंदून घेण्यासाठी ग्रामस्थांची झुंबड उडत आहे. जानेवारी महिन्यात गावासाठी चार बोअरचे अधिग्रहण आणि एका टॅंकरची मागणी करण्यात आली होती. यात मंजूर अधिग्रहणातील दोन बोअरचे पाणी आटले असून सध्या एका टॅंकरने सुरू असलेला पाणीपुरवठा कमी पडत आहे. 

यामुळे आणखी एका टॅंकरसह बोअरच्या अधिग्रहणाची मागणी केली असून त्यास अद्याप मान्यता मिळाली नसल्याचे उपसरपंच अमृत बसुदे यांनी सांगितले.