केदारखेडा (जि. जालना), ता. २८ : कोरोनामुळे सध्या सर्वत्र लॉकडाऊन सुरू आहे. ग्रामीण भागातील शाळेला सुट्या दिलेल्या आहेत. कोरोनाबाबत होणाऱ्या जागृतीमुळे मुलेही घराबाहेर जाऊ नयेत याची काळजी पालक घेताना दिसत आहेत. शेतशिवारातील मुलेही खेळताना सोशल डिस्टन्सिंग ठेवताना दिसत आहेत. 

ग्रामीण भागात शहरातून येणाऱ्यांबाबत धास्ती घेतली जात आहे. परिणामी कोरोनाच्या पार्श्‍वभूमीवर संसर्गाचा प्रादुर्भाव होऊ नये म्हणून अनेक ग्रामस्थांनी गावाऐवजी शेतात राहणे सुरू केले आहे.

हेही वाचा :  कोल्हापूरहून आलेल्या ऊसतोड मजूरांची तपासणी

शाळेला सुट्या असल्याने मुलांनी गावात इकडेतिकडे फिरू नये याबाबत अनेक सुज्ञ पालक लक्ष देत आहेत. एकमेकांपासून अंतर ठेवा, खोकताना, शिंकताना तोंडावर रुमाल असू द्या, गर्दी नको अशा सूचनाही दिल्या जात आहेत. त्यामुळे मुलेही खेळताना याबाबत दक्षता घेत आहेत. 

शेतात रमताहेत मुले 

कोरोनामुळे सध्या शेतकरीही सकाळपासून आपल्या पाल्याला सोबत घेऊन शेतात जात आहेत. त्यामुळे लहान मुले शेतात रमताना दिसत आहेत. आखाड्यासमोर, झाडाखाली खेळत आहेत. मुली भातुकली, खेळभांडी खेळण्यात मग्न होत आहेत. काड्या, छोटे टिपरू यांच्या साहाय्याने घर तयार करण्यातही अनेकजण आनंद मानत आहेत. 

कष्टकऱ्यांची मुले अनभिज्ञ 

वीटभट्टी कामगार, ऊसतोड कामगार, बिगारी मजूर, कष्टकऱ्यांची कामे बंद झाल्याने रोजीरोटीचा प्रश्‍न आहे. अनेक वीटभट्टी कामगार, बिगारी मजूर परिसरातील शेतात मिळतील ती कामे करीत आहेत. कष्टकऱ्यांची मुले मात्र कोरोनाबाबत अनभिज्ञ आहेत. ही मुले सध्या वीटभट्टी, झोपड्यांसमोर खेळताना दिसतात.