डोंगरकिन्ही (बीड): वय ९०, सात तारखेला त्यांना ताप आला. आठ मे रोजी रॅपीड ॲन्टीजेन तपासणी (covid 19 antigen test) केली असता ते पॉझिटिव्ह आले. आजोबांनी यापूर्वी कधीच दवाखाना पाहिला नव्हता. त्यांना वैद्यकीय अधिकाऱ्यांनी बीडच्या जिल्हा रुग्णालयात जाण्याचा सल्ला दिला. मात्र ते गेले नाहीत. त्यांचे एकच म्हणणे, मला येथेच गोळ्या द्या मी बरा होतो. तुम्हाला घरी राहता येणार नाही. तुमच्यामुळे इतरांनाही संसर्ग (corona infection) होऊ शकतो म्हटल्यावर त्यांनी शेतातच निवारा केला आणि तेथे उपचार घेतले. यातून बरेही झाले. गोपीनाथ बापू येवले असे या आजोबांचे नाव आहे.

गोपीनाथ येवले यांनी आपण कोरोनाबाधित असल्याची कसलीही धास्ती वाटून घेतली नाही. आपल्यामुळे घरातील व गावातील इतरांना संसर्ग होऊ नये म्हणून त्यांनी शेतातच खोपा बांधला. घरून येणारा दोन वेळेचा जेवणाचा डबा, नाष्टा व प्राथमिक आरोग्य केंद्रातील गोळ्या या व्यतिरिक्त कोणत्याही दुसऱ्या उपचार पद्धतीशिवाय ते कोरोनातून बरे झाले. विशेष म्हणजे ते शाकाहारी आहेत. यामुळे ताज्या पालेभाज्या, दाळी असा प्रोटीनयुक्त आहार डॉक्टरच्या सल्ल्याने त्यांना देण्यात आला.

कोरोनाची तुम्हाला भिती वाटली नाही का? असे विचारले असता त्यांनी मला ताप तर आला होता. कोरोना काय असतो ते माहीत नाही असे उत्तर दिले. त्यांनी बीडला जाण्यासाठी नकार दिला असला तरी मुलगा रघुनाथ येवले, वैद्यकीय अधिकारी व डोंगरकिन्ही येथील कोरोना केअर सेंटरचे कर्मचारी सतत त्यांच्या तब्येतीकडे लक्ष देत होते.