परभणी : अवघ्या जगावर कोरोनाचे विघ्न आले आहे. त्यामुळे विघ्नहर्त्या गणपतीबाप्पाच्या उत्सवावर पाणी फेरण्याची शक्यता आहे. कोरोनाचे संकट ऑगस्ट-सप्टेंबर महिन्यात साजऱ्या होणाऱ्या गणेशत्सवापुढे संकट उभे टाकले, त्याचा फटका मूर्तिकारांना सर्वाधिक बसला आहे. लाखो रुपयांचे साहित्य पडून असून मूर्ती कराव्यात की नाही या संभ्रमात मूर्तिकार पडले आहेत.
दरवर्षी अवघ्या महाराष्ट्रासह जगभरात जिथे जिथे मराठी माणूस आहे तिथे मोठ्या उत्साहात गणेशोत्सव साजरा केला जातो. त्यामुळे ऑगस्ट, सप्टेंबर महिन्यात चैतण्याचे, आनंदाचे आणि हर्षोल्हासाचे वातावरण असते. दरवर्षी विविध शहरांत, गावांत सार्वजनिक उत्सव मंडळे मोठमोठ्या मूर्तींची प्राणप्रतिष्ठापणा करतात. घरोघरीदेखील लहान मूर्ती आणल्या जातात. त्यातून मूर्तिकार आणि त्यावर आधारित व्यवसाय, कामगारांना रोजगार मिळतो. यातून मोठी आर्थिक उलाढालदेखील होत असते. दरवर्षी जानेवारी महिन्यापासून मोठ्या मूर्ती घडविण्याचे काम सुरू होते. यंदाही जानेवारी महिन्यात मूर्ती घडविण्याचे काम सुरू झाले होते. परभणी शहरात ६० हून अधिक मूर्ती कारखाने आहेत, तर जिल्ह्यातही संख्या ४०० च्या आसपास आहे. परभणी शहरात सर्वाधिक उंचीच्या आकर्षक मूर्ती बनविल्या जात असल्याने तेलंगणा, आंध्रप्रदेश, कर्नाटक या भागात परभणीतून मूर्ती मागविल्या जातात. त्यासाठी मार्च महिन्यापासून बुकिंग सुरू होते. यंदा मात्र कोरोनाचे विघ्न आले अन् विघ्नहर्त्याच्या मूर्ती घडविण्याऱ्या मूर्तिकारांवर संकट ओढावले आहे.

हेही वाचा :​ चिंता वाढली : नांदेडात कोरोनाचा दहावा बळी -

मूर्तिकार अडचणीत
परभणीतील अनेक मूर्तिकारांनी गत डिसेंबर आणि यंदाच्या जानेवारी महिन्यात लाखो रुपयांचे साहित्य खरेदी करून मोठ्या मूर्ती घडविण्याचे काम सुरू केले होते. प्लॅस्टर, रंग, माती आदी साहित्य आणून कारखान्यात कामाला गती दिली होती. परंतु, मार्च महिन्यात लॉकडाउन झाल्यानंतर काम बंद करावे लागले. त्यानंतर  कोरोनाचा प्रादुर्भाव वाढत राहिला अन् सार्वजनिक गणेशोत्सवाला परवानगी मिळण्याची शक्यता धुसर झाली आहे. सध्या वाढता प्रादुर्भाव लक्षात घेता, यंदाचा गणेशोत्सव अंधातरी आहे. त्यामुळे मूर्ती घडविण्याचे कामदेखील सुरू करता येत नसल्याने मूर्तिकार अडचणीत सापडले आहेत.

हेही वाचा :  प्रत्येकाला कोरोना योद्धा म्हणून वावरावे लागेल : पद्मश्री डॉ. रमन गंगाखेडकर
 

संभ्रमावस्था कायम
लाखो रुपयांचे खरेदी केलेल्या साहित्याचे करायच काय, त्यासाठी घेतलेले कर्ज फेडायचं कसं या विवंचनेत मूर्तिकार सापडले आहेत. गणेशोत्सव घरीच साजरा होणार हे जवळपास निश्चित झाले आहे. त्यामुळे मोठ्या मूर्तींऐवजी केवळ लहान मूर्ती तयार करण्यात येत आहेत. त्यादेखील कराव्यात की नाही या संभ्रमात मूर्तिकार सापडले आहेत. अद्याप शासनाकडून कोणतीही स्पष्टता आली नसल्याने संभ्रमावस्था कायम आहे.

मूर्तिकारांचा रोजगार बुडाला 
जानेवारी महिन्यात चार लाख रुपयांचे साहित्य खरेदी केले आहे. मूर्ती घडविण्याचे काम सुरू असताना कोरोनाचे संकट आल्याने काम थाबंले आहे. आता सार्वजनिक गणेशोत्सव होईल की नाही, हे सांगता येत नाही. त्यामुळे आणलेल्या साहित्याचे करायच काय, हा प्रश्न पडला आहे. जिल्ह्यात एक हजारावर अधिक कामगारांचा आणि मूर्तिकारांचा रोजगार बुडाला आहे.
-विशाल रिठ्ठे, मूर्तिकार, परभणी