बीड: Beed covid-19 update: कोरोना विषाणू संसर्गाची थांबत नसलेली लाट, पॉझिटिव्हिटी रेट आणि मृत्यूसत्र जिल्ह्यासाठी चिंतेची बाब होऊन बसल्या आहेत. शुक्रवारी (ता. २७) नवीन कोरोनाबळीची नोंद नसली तरी पुन्हा एकदा रुग्णसंख्येने सव्वाशेचा पल्ला गाठला. तपासणीच्या तुलनेत रुग्ण आढळण्याचे प्रमाणही २.३३ टक्क्यांवर पोचले. आष्टीची रुग्णसंख्या तर वाढती आहेच. शिवाय बीड तालुक्याची शुक्रवारची संख्या आष्टीहून अधिक आढळली. गुरुवारी (ता. २६) तपासणीसाठी घेतलेल्या ५ हजार १८४ लोकांच्या स्वॅब नमुन्यांच्या तपासणीचे अहवाल शुक्रवारी हाती आले. यामध्ये १२१ नवीन रुग्ण आढळले. तर, ५०६३ लोकांचे स्वॅब नमुने निगेटिव्ह आले.

आष्टीत २९ तर बीड तालुक्यात ३७ रुग्ण आढळले. तर, अंबाजोगाई तीन, धारुर ११, गेवराई १०, केज १३, माजलगाव एक, पाटोदा नऊ, शिरुर दोन आणि वडवणी तालुक्यात सहा रुग्ण आढळले. शुक्रवारी उपचारानंतर बरे झालेल्या ९७ रुग्णांना सुटी देण्यात आली. जिल्ह्यात आतापर्यंत एक लाख ८८१ रुग्णांची नोंद झाली आहे. तर, ९७ हजार १०१ रुग्ण कोरोनामुक्त झाले आहेत. सध्या १०७८ रुग्ण जिल्ह्यात व जिल्ह्याबाहेर उपचार घेत आहेत. दरम्यान, शुक्रवारी नवीन कोरोनाबळीची नोंद नाही. आतापर्यंत २७०२ जिल्ह्यातील कोरोनाग्रस्तांचा मृत्यू झाला आहे.