औरंगाबाद: मराठवाड्यात कोरोना रुग्णांची (covid 19) संख्या सातत्याने कमी होत असून दिलासा मिळत आहे. गुरुवारी दिवसभरात १ हजार ९०७ रुग्ण आढळले. जिल्हानिहाय वाढलेल्या रुग्णसंख्येत बीडमध्ये ६०३, उस्मानाबाद ३५६, औरंगाबाद २९९, नांदेड २०१, लातूर १९३, परभणी १२२, हिंगोली ८५ रुग्णांचे निदान झाले आहे. उपचारादरम्यान आणखी ६५ जणांच्या मृत्यूची नोंद झाली. त्यात लातुरमध्ये २२, औरंगाबाद १२, बीड-उस्मानाबादेत प्रत्येकी ८, हिंगोली ५, नांदेड ४, परभणी-जालन्यात प्रत्येकी तिघांचा समावेश आहे.

औरंगाबाद जिल्ह्यात आणखी १२ जणांचा मृत्यू झाला. हर्सूल येथील पुरुष (वय ७०), सईदा कॉलनीतील पुरुष (५६), गाडे पिंपळगाव येथील पुरुष (३०), संग्रामनगर, सातारा येथील पुरुष (६७), पानवी बुद्रूक (ता. वैजापूर) येथील महिला (७५), गंगापूर येथील पुरुष (७३), खामगाव (ता. फुलंब्री) येथील महिला (६३), शनिदेवगाव (ता. वैजापूर) येथील पुरुषाचा (५३) घाटी रुग्णालयात तर खासगी रुग्णालयात चार जणांचा मृत्यू झाला. आतापर्यंत ३ हजार १३५ जणांचा कोरोनाने बळी घेतला आहे.

औरंगाबादेत २९९ बाधित, १२ मृत्यू-
औरंगाबाद जिल्ह्यात २९९ कोरोनाबाधित आढळले. यात शहरातील ९८, ग्रामीण भागातील २०१ जण आहेत. आता रुग्णांची संख्या १ लाख ४१ हजार ७५० वर पोचली आहे. बरे झालेल्या आणखी ५४८ जणांना सुटी देण्यात आली. त्यात शहरातील १६०, ग्रामीण भागातील ३८८ जणांचा समावेश आहे. आतापर्यंत १ लाख ३४ हजार पाच रुग्ण बरे झाले आहेत. सध्या ४ हजार ६१० जणांवर उपचार सुरू आहेत.