लातूर: कोरोना बाधितांची संख्या लक्षणीय वाढली आहे. शहरात कोरोना रुग्णालयेदेखील वाढली आहेत. पण, या रुग्णालयात व तेथे असलेल्या मेडिकल दुकानात मात्र रेमडेसिव्हिर इंजेक्शन रुग्णांना दिले जात नाही. तुटवडा आहे, असे सांगून रुग्णांच्या नातेवाइकाला बाहेरहून आणण्यास सांगितले जात आहे. हे नातेवाईक दिवसभर एका दुकानातून दुसऱ्या दुकानात असे फिरून निराश होऊन रात्री परत रिकाम्या हाताने रुग्णालयात येत आहेत. पण, हेच दुकानदार काळ्या बाजारात मात्र या इंजेक्शनची विक्री करीत आहेत. याकडे महापालिकेने लक्ष देण्याची गरज आहे.
गेल्या काही दिवसांपासून कोरोना रुग्णांची संख्या वाढत चालली आहे. येथील विलासराव देशमुख शासकीय वैद्यकीय विज्ञान संस्था, तसेच या संस्थेचे सुपर स्पेशालिटी कोविड डेडिकेटेड हॉस्पिटलसह सर्वच कोविड खासगी रुग्णालय हाऊसफुल्ल आहेत. रुग्णांना दाखल करण्यासाठी वशिले लावावे लागत असल्याची परिस्थिती आहे. कोविड हा रोग संसर्गजन्य आहे. हे डॉक्टरांनाही माहीत आहे. त्यामुळे कोविड रुग्णालयात येणारा रुग्ण किंवा त्याच्या संपर्कात आलेले त्याचे नातेवाईक फारसे बाहेर फिरता कामा नयेत. त्यामुळे अशा कोविड रुग्णालयाच्या ठिकाणी असलेल्या मेडिकल दुकानात रेमडेसिव्हिरसह इतर सर्वच औषधे उपलब्ध असली पाहिजेत.
तेथेच रुग्णांना खरेदी करता आली पाहिजे. पण, येथे चित्र मात्र वेगळेच दिसून येत आहेत. कोविड रुग्णालयाच्या मेडिकल दुकानाला रेमडेसिव्हिरचा पुरवठाही केला जात आहे. प्रशासनही रोज त्याची माहिती देत आहे. पण, हे मेडिकल दुकानचालक मात्र रुग्णांच्या नातेवाइकांची अडवणूक करीत आहेत. स्टॉक नाही तुम्ही दुसरीकडून खरेदी करून आणा असे सांगितले जात आहे. त्यामुळे रुग्णाचे नातेवाईक दिवसभर एका दुकानातून दुसऱ्या दुकानात चकरा मारताना दिसत आहेत. काळ्या बाजारात मात्र या इंजेक्शनची विक्री सर्रास होताना दिसत आहे.
कर्मचारी हेरतायत सावज-
शहरातील काही कोविड रुग्णालयात तर अजब प्रकार सुरू आहे. अशा रुग्णालयात एखादा रुग्ण दाखल झाल्यानंतर त्याच्या नातेवाईकाला बाहेरहून रेमडेसिव्हिर आणण्यास सांगितले जात आहे. त्यात नातेवाईक दुकान सोडून बाहेर गेला की त्याला रुग्णालयातील कर्मचारीच फोन करून त्याची भेट घेत आहेत. एवढ्या किमतीला इंजेक्शन आहे, घेताय का की दुसऱ्याला देऊ? असे म्हणून जास्तीच्या किमतीला ते विकण्याचे प्रकारावरही आता महापालिकेने लक्ष देण्याची गरज आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.