कळमनुरी (जि.हिंगोली) : दोन दिवसांपूर्वी ओढ्याच्या पाण्यात वाहून गेलेल्या कुंडलिक असोले यांचा मृतदेह रविवार (ता. २२ जून) सकाळी सहा वाजता पुयना तलावात आढळून आला. त्यानंतर त्यांचा शोध घेणाऱ्या नागरिकांनी तो पाण्याबाहेर काढून शवविच्छेदन केले. असोलवाडी या त्यांच्या गावात शोकाकुल वातावरणात त्यांच्यावर अंत्यसंस्कार करण्यात आले.

शुक्रवार (ता.१९ जून) सायंकाळी सहाच्या सुमारास कुंडलिक असोले आणि पत्नी धुरपतबाई असोले हे शेतातील आखाड्यावर बैलगाडी घेऊन निघाले होते. दरम्यान पुल नसल्यामुळे ओढ्यातूनच वाट काढून शेतावर जावे लागते. नेहमीप्रमाणे दोघेही पाण्यातून जात होते. परंतु, ओढ्यातील पाण्याचा अंदाज न आल्यामुळे दोघेही बैलगाडीसह वाहून गेले. त्यानंतर परिसरातील  नागरिक व प्रशासनाच्या वतीने ओढ्याच्या व तलावाच्या परिसरात शोध मोहीम हाती घेतली होती. दरम्यान शनिवार (ता. २० जून) सकाळी तलावाच्या परिसरात धुरपतबाई आसोले यांचा मृतदेह आढळून आला होता.

हेही वाचा - कोण म्हणतंय समाजातली माणूसकी आटलीय !
 

इथेच कुठेतरी कुंडलिक असोले यांचाही मृतदेह असेल, म्हणून दिवसभर शेकडो नागरिकांनी हा परिसर पिंजून काढला. मात्र, तरीही कुंडलिक आसोले आढळून आले नाही. त्यानंतर तहसीलदार कैलासचंद्र वाघमारे यांनी या प्रकाराची माहिती जिल्‍हा आपत्‍ती कक्षाला देऊन पुणे येथील एनडीआरएफ यांच्याकडेही मदतीची मागणी केली होती. दिवसभर प्रशासनातील अधिकाऱ्यांनी स्थानिक नागरिकांच्या मदतीने शोध मोहीम राबविल्यानंतर सायंकाळी उशिरा ही शोध मोहीम थांबविण्यात आली.

हे देखील वाचाच - असं जगता आले तर बरं होईल, कसे? ते वाचाच 
 

दरम्‍यान रविवार सकाळी सहा वाजताच पुयना तलावामध्ये कुंडलिक आसोले यांचा शोध घेण्यासाठी नायब तहसीलदार श्रीराम पाचपुते, समशेर पठाण ,कांता पाटील, असोलवाडी येथील संभाजी माने, तुळशीराम भिसे, माधव आसोले, नामदेव मुकाडे, शिवराम असोले, गजानन डुकरे, राजेश काळे, शालिकराम डाखोरे, संतोष असोले, खोब्राजी काळे यांच्यासह नागरिक दाखल झाले होते. 

येथे क्लिक कराच - Video : वा रे पट्ठ्या..! ‘रेल्वे मोपेड ट्रॉली’ला लावले दुचाकीचे इंजिन
 

शनिवारी  झालेल्या पाण्यामुळे तलावाची पाणी पातळी वाढून गाळात अडकलेल्या कुंडलिक असोले यांचा मृतदेह आढळून आला असल्याची माहिती नायब तहसीलदार श्री. पाचपुते यांनी पोलीस व वरिष्ठांना दिली आहे. कळमनुरी येथील ग्रामीण रुग्णालयात शवविच्छेदन करून कुंडलिक आसोले यांच्यावर त्यांचे मूळ गावी असलेल्या असोलवाडी येथे शोकाकुल वातावरणात अंत्यसंस्कार करण्यात आले.