गेवराई (बीड): जुन्या भांडणाच्या कारणावरून एका तरुणावर भरदुपारी गोळीबार करण्यात आला. मात्र, संबंधित तरुणाने सतर्कता दाखविल्याने तो बचावला. ही घटना शुक्रवारी (ता.१६) दुपारी तीनच्या सुमारास तालुक्यातील मादळमोही येथे घडली. हा सर्व प्रकार सीसीटीव्ही कॅमेऱ्यामध्ये कैद झाला. याप्रकरणी दोघांविरोधात गेवराई पोलिस ठाण्यात गुन्हा नोंद करण्यात आला.

मादळमोही येथील पवन गावडे या तरुणाचे महामार्गालगत घर व तेथेच बांधकाम साहित्याचे दुकान आहे. शुक्रवारी दुपारी तीनच्या सुमारास या दुकानासमोर गावडे थांबले असता याठिकाणी दोन तरुण दुचाकीने आले. यानंतर जुन्या भांडणातून नोंद असलेला गुन्हा परत घे म्हणून गावडे यांच्याशी हुज्जत घालत त्याच्या डोक्याला एकाने पिस्तूल लावून गोळी झाडली. यावेळी गावडे यांनी सतर्कता दाखविल्याने गोळी डोक्याला चाटून गेली.

हा सर्व थरार सीसीटीव्हीत कैद झाला. याप्रकरणी गावडे यांच्या तक्रारीवरून संजय पवार व अविनाश पवार या दोघांविरोधात गुन्हा नोंद झाला. तपास सहायक पोलिस निरीक्षक संदीप काळे करीत आहेत.