जालना : तालुक्यातील शंभू सावरगाव येथील पायल मच्छिंद्र जाधव (वय १३) या मुलीचा खून झाल्याप्रकरणी नऊ दिवसांनंतर सेवली पोलिस ठाण्यात गुन्हा दाखल झाला आहे. तालुक्यातील शंभू सावरगाव येथील पायल जाधव हिच्यासह तिची मैत्रीण रविवारी बेपत्ता झाली होती. नातेवाइकांनी या मुलींचा शोध घेतला मात्र, त्या मिळून आल्या नव्हत्या. त्यामुळे संपूर्ण गावात या मुली पळून गेल्याची चर्चा सुरू झाली होती.

त्यात रविवारी (ता.१६) रात्री उशिरा बेपत्ता झालेली एक मुलगी घरी परत आली होती. तर सोमवारी (ता.१७) सकाळी पायल हिचा गावातील मंदिराच्या पाठीमागे असलेल्या एका विहिरीत मृतदेह आढळून आला होता. या प्रकरणी नऊ दिवसानंतर मयत पायल जाधव हिच्या वडिलांच्या फिर्यादीवरून काही संशयितांविरोधात सेवली पोलिस ठाण्यात खुनाचा गुन्हा दाखल झाला आहे. मात्र, या गुन्हा दाखल झाल्यानंतर संशयित आरोपींची नावे सेवली पोलिसांकडून गुलदस्त्यात ठेवली आहेत.