उमरगा (जि.उस्मानाबाद) : नुकत्याच झालेल्या क्रिकेटच्या 'आयपीएल'च्या संपूर्ण वेळापत्रकामध्ये उमरगा शहरात करोडो रुपयांचा सट्टाबाजार  खेळला व घेतला गेल्याची माहिती बाहेर येत आहे. यात  सट्टाबाजार खेळणाऱ्यांचे करोडो रुपये बरबाद झाल्याची, तर सट्टा घेणारे बुक्की चालक मात्र आर्थिक फायद्यात असल्याची माहिती सांगण्यात येत आहे. दरम्यान सट्टा व बेटिंग खेळण्यावर कायद्याने बंदी असताना शहर व परिसरात हा सट्टाबाजार मोठ्या प्रमाणात सुरू असताना याची पोलीसाना खबर नव्हती हे न उलगडणारे कोडे आहे. या संदर्भात सट्टाबाजार खेळणाऱ्याने नाव न छापण्याच्या (Indian Premier League) अटीवर व नाव गुप्त ठेवण्याच्या अटीवर ही माहिती दिली. क्रिकेटवरचा सट्टाबाजार हा मोठ्या शहरातच खेळला जातो,  हा समज आता चुकीचा ठरविला जात असून, उमरगासारख्या (Umarga) छोट्या शहरातसुद्धा सुरू आहे. सट्टा खेळणाऱ्यामध्ये उच्चभ्रू , सुशिक्षित व व्यापारी मंडळीसह अनेक जण सामील (Osmanabad) असतात.

क्रिकेटचा सामना सुरू होऊन समाप्त होईपर्यंत, प्रत्येक चेंडू, षटक, धावा, अर्धशतक, विकेट ह्यावर सट्टा लावला जातो. परिस्थितीनुसार सट्टाचा भाव खालीवर होत असतो. सट्टा खेळणारा जर विश्वासू असेल तर बुक्की त्या कडून डिपॉझिट घेत नाही. अन्यथा इतर सट्टा खेळणाऱ्यांकडून बुक्की डिपॉझिट घेते. येथे मोठ्या प्रमाणात कर्नाटक व तेलंगणा येथील मंडळी बुक्कीकडे सट्टा लावतात. कारण तिथे पोलीस मंडळी रेड टाकतात, कायद्याची अंमलबजावणी कडकपणे होते. उमरगा शहरात क्रिकेटवर सट्टा घेणारे सहा ते आठ बुक्की असून, पंधरा लाख रुपयेपर्यंतचा खेळ स्वतःकडे ठेवतात. त्यापुढील खेळ मोठ्या शहरातील मोठ्या बुक्कीकडे देतात. हा व्यवहार करोडो रुपयेत होत असल्याची माहिती समोर येत आहे. विशेष म्हणजे बुक्कीच्या लॅपटॉपला सट्टा खेळणाऱ्याचे मोबाईल जोडलेले असतात. एका लॅपटॉपला किमान पन्नास ते दीडशे मोबाईल जोडलेले असतात. ज्याच्या माध्यमातून सट्टाबाजारचा गोरख धंदा बिनदिक्कत सुरू होता. आता आयपीएलचा मोसम संपला असला तर २०/२० क्रिकेटचा वर्ल्ड कप सुरू झाला आहे. ह्यावर सुद्धा सट्टाच्या माध्यमातून करोडो रुपयेची उलाढाल होईल अशी माहिती समोर येत आहे.