लातूर - येथील जुन्या औसा रस्त्यावर हातात कत्ती घेऊन दहशत पसरवणे, रस्त्यावरील गाड्या फोडणे, तिघांना जखमी केल्याप्रकरणी दोघांना पोलिसांनी अटक केली आहे. एक जण फरारी आहे. या दोघांना २२ जुलैपर्यंत पोलिस कोठडीत ठेवण्याचे आदेश न्यायालयाने आज दिले आहेत, अशी माहिती शिवाजीनगर पोलिस ठाण्याचे सहायक निरीक्षक दयानंद पाटील यांनी दिली.

येथील जुना औसा रस्त्यावर लक्ष्मी कॉलनी परिसरात मंगळवारी रात्री काही तरुणांना धिंगाणा घातला. हातात कत्ती घेऊन दहशत पसरवण्याचा प्रयत्न केला. रस्त्यावर असलेल्या आठ-दहा कारच्या काचाही फोडल्या. शिवाजीनगर पोलिस ठाण्याचे निरीक्षक दिलीप डोलारे यांनी घटनास्थळी भेट दिली. पोलिसांच्या पथकाने तातडीने कारवाई करीत अजिंक्य मुळे (रा. दादोजी कोंडदेवनगर) व संकेत तावरे (रा. लक्ष्मी कॉलनी) या संशयितांना ताब्यात घेतले. यात ओम यादव (रा. वसवाडी) हा फरारी झाला.

या तरुणांनी रस्त्यावरील गाड्या फोडल्याच; पण तिघांना जखमी केले. यात कत्तीचा वार लागल्याने स्वप्नील शिवराज इंडे (रा. सास्तूर) हा वाहनचालक जखमी झाला आहे. त्याच्या फिर्यादीवरूनच शिवाजीनगर पोलिस ठाण्यात गुन्हा नोंद करण्यात आला आहे. स्वप्नील इंडे हा एका गाडीत बसला होता. तेथे हे तरुण आले. त्यांना पैशांची मागणी केली. कत्तीने त्यांच्या मांडीवर वार करून जखमी केले. लाथाबुक्क्यांनी मारहाण करून त्याच्या गाडीच्या काचाही फोडल्या. तसेच विकास विनायक ऐकुरगे व वीरभद्र उत्तम स्वामी यांच्याकडेही पैशाची मागणी करून व त्यांना कत्तीने मारहाण करून मोबाइल हिसकावून घेतला. या प्रकरणी पोलिसांनी संकेत तावरे व अजिंक्य मुळे यांना अटक करून आज न्यायालयासमोर उभे केले. त्यांना २२ जुलैपर्यंत पोलिस कोठडीत ठेवण्याचे आदेश न्यायालयाने दिल्याची माहिती पाटील यांनी दिली.

मुळे सराईत गुन्हेगार

पोलिस उपअधीक्षक जितेंद्र जगदाळे यांनी घटनास्थळी भेट दिली. तपासाच्या संदर्भात सूचना दिल्या. या प्रकरणातील अजिंक्य मुळे हा सराईत गुन्हेगार आहे. त्याच्यावर अनेक गुन्हे दाखल आहेत. त्याच्यावर मोठी कारवाईचे संकेत जगदाळे यांनी दिले.