अंबाजोगाई : मागील चार दिवसांपासून स्वामी रामानंद तीर्थ वैद्यकीय महाविद्यालय रुग्णालयात उपचार सुरू असलेल्या ‘त्या’ बाळाने शुक्रवारी (ता.११) रात्री अखेरचा श्वास घेतला. दरम्यान, या घटनेचा चौकशी अहवाल येणे अद्याप बाकी आहे.

येथील स्वामी रामानंद तीर्थ वैद्यकीय महाविद्यालयात महिला प्रसूत झाली होती. तेव्हा तिचे बाळ मृत घोषित करून नातेवाइकांना सोपवले होते.

मात्र, घरी नेल्यानंतर या बाळाच्या हालचाली सुरू झाल्या. बाळ जिवंत असल्याचे लक्षात येताच नातेवाइकांनी रुग्णालय गाठले होते. त्यानंतर मंगळवारपासून (ता. आठ) अतिदक्षता विभागात उपचार सुरू होते.

शुक्रवारी रात्री या बाळाने अखेरचा श्वास घेतला. दरम्यान, प्रभारी अधिष्ठांतांनी यापूर्वीच्या घटनेच्या चौकशीसाठी दोन समित्या नियुक्त केल्या आहेत.

हे बाळ हे फक्त २६ आठवड्यांचे होते, त्याचे वजनही कमी म्हणजेच ९०० ग्रॅम होते. त्यामुळे त्याचे विविध अवयवही विकसित झाले नव्हते, याबाबतची माहिती नातेवाइकांनाही दिली होती. डॉक्टरांनी बाळाला वाचवण्याच्या दृष्टीने प्रयत्न केले. मात्र, त्याच्या प्रकृतीने प्रतिसाद दिला नाही.

- डॉ. गणेश तोंडगे,

स्त्रीरोग विभागप्रमुख