जिंतूर (जि.परभणी) : शेतातील आखाड्यावर राहणाऱ्या दोन शाळकरी विद्यार्थ्यांनी मोबाईलच्या बॅटरीला डिटोनेटरचे कनेक्शन लावल्याने मोठा स्फोट होऊन दोघे जण जखमी झाल्याची घटना बुधवारी (ता.१३) दुपारी १२ वाजताच्या सुमारास घडली. याबाबत माहिती अशी की, जिंतूर शहरापासून एक किलोमीटर अंतरावर असलेल्या जालना रस्त्यावरील शेख सलीम यांच्या आखाड्यावर शाहिद पठाण सालगडी म्हणून राहतात. त्यांचा मुलगा अमन शाहिदखाँ पठाण (वय १३ ) व शेख असलम शेख अब्दुल ( वय १०) हे दोघे व जालना रस्त्यावर असलेल्या वाॅशिंग सेंटर जवळ खेळत होती. (Detonator Explosion In Jintur Of Parbhani District)

याच वाशिंग सेंटरच्या बाजूला असलेल्या एका गोदामाजवळ त्यांना ब्लास्टिंगसाठी जिलेटिनच्या काड्यांना उडवण्यासाठी डिटोनेटरचा संच पडलेला दिसला. या मुलांनी आपल्याजवळ असलेल्या मोबाईलची बॅटरी काढून त्याचे कनेक्शन डिटोनेटर (Detonator) लावले. त्यामुळे मोठा स्फोट झाला. या स्फोटात अमन शाहिदखाँ पठाण याच्या डाव्या हाताची पाचही बोटे व उजवा डोळा निकामी झाला. तर शेख असलम शेख अब्दुल याच्या डाव्या डोळ्यावरील भागाला खोलवर इजा झाली.

स्फोटानंतर संबंधित मुलांना येथील ग्रामीण रुग्णालयात दाखल करण्यात आले. प्राथमिक उपचारानंतर त्यांना परभणी (Parbhani) येथील जिल्हा रुग्णालयात पाठविण्यात आले आहे. वाढती उष्णता व मोबाईल बॅटरीचा केलेला अयोग्य वापरामुळे ही घटना घडल्याचे बोलले जात आहे.