वसमत ( जिल्हा हिंगोली ) : येथील तहसील कार्यालयात आपत्ती व्यवस्थापन कक्षाची स्थापना ता. एक जुन रोजी करण्यात आली असून नागरीकांनी संपर्क करण्याचे आवाहन तहसीलदार अरविंद बोळंगे यांनी बुधवारी (ता. २३) केले आहे.

सध्या पावसाळी हंगामाला सुरुवात झाली आहे. त्यामुळे नेमके या हंगामात अनेक प्रकारचे नैसर्गिक संकटे निर्माण होतात. नागरिकांना अचानक आलेल्या नैसर्गिक आपत्तीचा सामना करण्याची वेळ येऊ शकते. यामध्ये ढगफुटीमुळे गावात पाणी घुसते, नदीला पुर येऊन रस्ता बंद होणे तसेच पुरामुळे नदीच्या दोन्ही भागातील गावाचा संपर्क तुटल्याने निर्माण होणारे जलसंकू, पूरात माणसे, जनावरे वाहुन जाणे, अती पावसाने शेतीपिकाचे नुकसान होणे, वीज पडून माणसे, जणावरे दगावने आदी प्रकारच्या नैसर्गिक आपत्ती अतिवृष्टीमुळे निर्माण होतात.

हेही वाचा- डेल्टा प्लस विषाणूचा धोका पाहून राज्यात पुन्हा कडक निर्बंध लावण्यात येणार

अशा आपत्तीच्या वेळी प्रशासनाकडून तात्काळ मदत मिळण्याची अपेक्षा असते परंतू नेमकं मदत कुणाकडे मागायची यांची नागरीकांना माहिती नसते. तसेच तालुक्यातून अनेक छोट्या-मोठ्या नद्या वाहतात त्यामुळे या नद्यांना पुर येऊन संकटे निर्माण होऊ शकतात. अशा आपत्तीच्या काळात नागरीकांना प्रशासनाची तात्काळ मदत मिळावी यासाठी तहसिलदार अरविंद बोळंगे यांनी तहसिल कार्यालयात एक जुन रोजी आपत्ती व्यवस्थापन कक्षाची स्थापना केली आहे. आपत्ती व्यवस्थापन कक्षात संपर्क करण्यासाठी ०२४५४- २२००२८ या दूरध्वनी वर नागरीकांनी संपर्क साधून नैसर्गिक आपत्तीची माहिती द्यावी असे आवाहन तहसीलदार अरविंद बोळंगे यांनी केले आहे.

संपादन- प्रल्हाद कांबळे