हिंगोली: तालुक्‍यातील माळहिवरा येथे भारत स्‍काऊट गाईडच्या जिल्‍हास्‍तरीय सोळाव्या मेळाव्यात साठ शाळेतील बाराशे विद्यार्थी सहभागी झाले होते. तीन दिवस झालेल्या कार्यक्रमात संचलन, तंबू उभारणी, शेकोटी, प्रदर्शन, शोभायात्रा, बिनभांड्याचा स्‍वयंपाक आदी उपक्रम राबविण्यात येत असून विद्यार्थ्यांमधून एकतेचे दर्शन पाहावयास मिळाले.

हिंगोली तालुक्‍यातील माळहिवरा येथील संत ज्ञानेश्वर इंग्‍लिश स्‍कूल येथे बुधवारपासून (ता. २९) स्‍काऊट गाईडचा जिल्‍हास्‍तरीय मेळावा घेण्यात आला. शुक्रवारी (ता. ३१) मेळाव्याची सांगता झाली. यात जिल्‍हाभरातील पाचवी ते दहावीपर्यंतचे विद्यार्थी सहभागी झाले होते. तसेच स्‍टील ग्रे रंगाचा शर्ट, ब्‍ल्‍यू रंगाची पॅन्ट, काळे मोजे, नायलॉन बेल्‍ट असा गणवेश परिधान केला होता. कुटुंबापासून दूर राहत स्‍वतःची कामे स्‍वत: करणे, वर्गमित्रांसोबत दिवसभर राहणे, एकत्रित भोजन, सांस्‍कृतिक कार्यक्रमांसह विविध स्‍पर्धेत सहभाग व निसर्ग निवासाचा अनुभव मिळाल्याने विद्यार्थ्यांचा आनंद द्विगुणित झाल्याचे पाहावयास मिळाले.

हेही वाचा - व्हिडीओ- हिंगोलीत विम्याच्या पैशासाठी शेतकरी संघटनेने केली तोडफोड ​

विविध स्पर्धांचा समावेश

तसेच प्रदर्शन स्‍पर्धा, आकाशकंदील, कागद कामाचे प्रकार, टाकाऊपासून टिकाऊ, ग्रिटिंग कार्ड, वायरच्या पिशव्या, बाहुल्या, शास्‍त्रीय उपकरणे, वैज्ञानिक उपकरणे, स्‍त्री भ्रूण हत्या विषयी जनजागृती पोष्टर, समता, स्‍वातंत्र्य, बंधुता, एकात्‍मता या विषयांवर आधारित राष्‍ट्रपुरुषांचे दर्शन घडविणे, पुरातन नाणी, पोस्‍ट कार्ड संकलन आदींचे प्रदर्शन भरविण्यात आले होते. तसेच तीन दिवसांत संचलन, तंबू उभारणी, ध्वजवंदन, शेकाटी, बिनभांड्याचा स्‍वयंपाक, शोभायात्रा, लेझीम, प्रथमोपचार स्‍पर्धा घेण्यात आल्या.

बाराशे विद्यार्थी सहभागी

यात सर्व विद्यार्थ्यांचा सहभाग होता. शेकोटीच्या स्‍पर्धेत शेकोट्या तयार करून त्‍यासमोर आदिवासी नृत्‍य, गरबा नृत्‍य, देशभक्‍तीवर गीते, गोंधळ, बंजारा गीत, कोळी आदी नृत्‍य सादर करीत विद्यार्थ्यांनी एकतेचे दर्शन घडविले. विविध समित्या स्‍थापन करून विद्यार्थ्यांना कामे विभागून देण्यात आली होती. जिल्हाभरातील तब्बल बाराशे विद्यार्थी यामध्ये सहभागी झाले होते. विविध स्पर्धा घेण्यात आल्या. या स्पर्धेतून विद्यार्थ्यांना आपल्यातील सुप्त गुणांना वाट मोकळी करून दिली. अनेक विद्यार्थ्यांचे नेतृत्व विकसित झाल्याचे पाहावयास मिळाले.

येथे क्लिक करा -  हिंगोलीत बॅंक कर्मचारी संपामुळे पाचशे कोटींचा व्यवहार ठप्प ​

शेकोटी कार्यक्रमाचे उद्‍घाटन

गुरुवारी (ता.३०) सायंकाळी शेकोटी कार्यक्रमाचे उद्‍घाटन जिल्‍हा परिषद सदस्य ॲड. अमोल जाधव यांच्या हस्‍ते झाले. या वेळी स्‍काऊट गाईडचे आयुक्‍त जे. एन. असोले, अशोक पवार, तुळशिराम हजारे, संजय गिरी, रतन आडे, अनुराधा जाधव, राहुल शेजूळ, कुंडलिक शिंदे, रेखा होडगीर आदींची उपस्‍थिती होती.