जालना : मराठा आरक्षणासाठी जिल्ह्यातून मनोज जरांगे यांनी उभ्या केलेल्या आंदोलनानंतर जिल्हा प्रशासनही कुणबी प्रमाणपत्र वाटपात गतिमान झाले आहे. मागील दोन दिवसांमध्ये जिल्हा प्रशासनाकडून तब्बल २९६ कुणबी प्रमाणपत्र वाटप झाले आहेत.

मराठा आरक्षणाच्या मागणीसाठी आंतरवाली सराटी येथे मनोज जरांगे यांनी उपोषण केले. त्यामुळे राज्य शासनाकडून मराठा कुणबी, कुणबी मराठा नोंदीचा शोध घेण्यास सुरवात झाली. जिल्ह्यात आतापर्यंत तीन हजार ३१८ कुणबी नोंदी आढळून आल्या असून नोंदी शोधण्यासह कुणबी प्रमाणपत्रांचे वाटप करण्यासाठी जिल्हा प्रशासनाने शुक्रवार (ता.१९) ते रविवार (ता.२१) सार्वजनिक सुटी असतानाही शासकीय कार्यालयांचे काम सुरू ठेवले आहे. दरम्यान मागील दोन दिवसांमध्ये जिल्हा प्रशासनाकडे ३९१ जणांनी कुणबी प्रमाणपत्रासाठी अर्ज केला होता.

त्यापैकी २९६ जणांना कुणबी प्रमाणपत्र वाटप झाले आहे. आतापर्यंत तीन हजार ३१८ नोंदी सापडल्या असून दोन हजार ३१० जणांना कुणबी प्रमाणपत्रांचे जिल्हा प्रशासनाकडून वाटप करण्यात आले आहे. शिवाय शुक्रवार (ता.१९) ते रविवारी (ता.२१) दरम्यानही कुणबी प्रमाणपत्र वाटपासह नोंदींचा शोध घेतला जाणार आहे.

तर शोध मोहिमेदरम्यान पुन्हा परतूर, भोकरदन, मंठा तालुक्यातील काही गावांमध्ये कुणबी नोंदी मिळून आल्याची माहिती उच्चपदस्थ अधिकाऱ्यांनी सांगितले. जवळपास या पाचशे कुणबी नोंदी असून या नोंदीचे दस्त शिंदे समितीला सादर केल्यानंतर या कुणबी नोंदीची माहिती जिल्हा प्रशासन जाहीर करणार आहे.

मराठा आरक्षणाच्या अनुषंगाने राज्य शासनाच्या आणि शिंदे समितीच्या सूचनेनुसार कुणबी नोंदीचा शोध सुरू आहे. आतापर्यंत तीन हजार ३१८ नोंदी मिळून आल्या असून आतापर्यंत दोन हजार ३१० जणांना कुणबी प्रमाणपत्र वाटप करण्यात आले आहे. मागील दोन दिवसांमध्ये २९६ कुणबी प्रमाणपत्र वाटप केले आहेत.

—डॉ. श्रीकृष्ण पांचाळ, जिल्हाधिकारी, जालना.