औरंगाबाद : "साहेब दिवाळीच्या उत्साहात आम्हाला नागरिकांच्या रोषाला समोरे जावे लागत आहे.' ऐन दिवाळीच्या दिवशीच सिडको-हडकोला पाणी पुरवठा न केल्यामुळे संतप्त झालेल्या भारतीय जनता पक्षाच्या आठ नगरसेवकांसह आमदार अतुल सावे, शहराध्यक्ष किशनचंद तनवाणी यांनी रविवारी (ता.चार) पालिकेचे पाणी पुरवठा अभियंता हेमंत कोल्हेना घेराव घालत जाब विचारला.

सिडको-हडकोतील 28 वार्डाला सिडको एन-पाच येथील पाण्याच्या टाकीवरून पाणी पुरवठा केला जातो. यासाठी दररोज 32 एमएलडी पाण्याची गरज भासते. मात्र टाकीत केवळ पंधरा ते वीस एमएलडी एवढेच पाणी पुरवण्यात येते. रविवारी सिडको, हडकोतील बहुतांश भागात पाणी पुरवठा करण्यात आला नाही. ऐन दिवाळीच्या दिवशी पाणी न आल्यामूळे नागरिकांनी नगरसेवकांना भंडावून सोडले. नागरिकांच्या रोषाला समोरे गेलेले नगरसेवक नितीन चित्ते व इतरांनी रविवारी सकाळी आठ वाजेपासून सिडकोतील पाण्याच्या टाकीचे गेट बंद करीत टॅंकरने होणारा पाणी पुरवठा बंद पाडला.

या घटनेनंतर महापौर नंदकुमार घोडेले, पाणी पुरवठा अभियंता हेमंत कोल्हे यांनी घटनास्थळी धाव घेतली. यावेळी महापौरांनी सोमवारी या प्रश्‍नी महापालिका आयुक्‍तांसोबत बैठक घेण्याचे आश्‍वासन दिले. भाजपचे नगरसेवक, नितिन चित्ते, बालाजी मुंढे, प्रशांत देसरडा, माधुरी अदवंत, पुष्पाताई रोजसकर, माजी महापौर भगवान घडामोडे, नगरसेवक दिलीप थोरात, आमदार अतुल सावे, भाजप शहराध्यक्ष किशनचंद तनवाणी यांनी पाण्याच्या टाकीजवळ येत कार्यकारी अभियंता हेंमत कोल्हे यांना पाण्याविषयी विचारणा केली. समाधानकारक उत्तर न मिळाल्याने संतप्त झालेल्या नगरसेवकांनी येथे ठिय्या आंदोलन केले. कोल्हे यांनी पाणी पुरवठा सुरळीत केल्यानंतर नगरसेवकांनी माघार घेतली.

पाणी नाही कसला वाढदिवस साजरा करताय.... 
भाजप नगरसेवक नितीन चित्ते यांचा आज वाढदिवस आहे. याच दिवशी पवननगर परिसरात पाणी पुरवठा न झाल्यामूळे संतप्त झालेल्या तीसहून अधिक महिलांनी पहाटे सहा वाजता नगरसेवक नितीन चित्ते यांच्या घरी धडक दिली. पाणी नाही कसला वाढदिवस साजरा करताय असा संतप्त सवाल उपस्थितांनी केला. त्यामुळे सकाळपासून नितीन चित्ते यांनी सिडको एन- पाचच्या पाण्याच्या टाकीचे गेट बंद करत वाढदिवस साजरा न करण्याचा निर्णय घेतला.