हिंगोली : दिवाळी सणाला वसु बारसेने सुरवात झाली. त्यानंतर धनत्रयोदशी व सोमवारी लक्ष्मीपूजन असल्याने रविवारी बाजारात मोठ्या प्रमाणावर झेंडूच्या फुलांची आवक झाली आहे. महात्मा गांधी चौक ते गणपती चौकापर्यंत रस्त्याच्या दुतर्फा विक्रेत्यांनी झेंडूच्या फुलांचे ढिगारे लावले होते. आवक वाढल्याने भावात घसरण झाली. दसऱ्याला चाळीस रुपये विकणारी फुले पंधरा ते वीस रुपये किलो प्रमाणे विकली.

दिवाळीच्या सणात येणाऱ्या लक्ष्मी पूजनास विशेष महत्त्व असल्याने या दिवशी घराला आ़ंब्याचे तोरण, झेंडूच्या फुलाच्या माळा तसेच घरात असलेल्या देवदेवतांच्या फोटोला फुलांचे हार, दुचाकी, चारचाकी वाहनालादेखील पुष्पहार लावले जातात. घरोघरी लक्ष्मी पूजन केले जाते; तसेच व्यापारीही प्रतिष्ठानात लक्ष्मी पूजन करतात. यामुळे झेंडूच्या फुलांना मागणी असते.

दसरा व दिवाळी सणाला झेंडूची मागणी पाहता झेंडू उत्पादक शेतकऱ्यांनी त्याची लागवड केली होती. दसरा सणाला झेंडूच्या फुलांना तीस ते चाळीस रुपये भाव मिळाला होता. दिवाळीच्या सणाला मात्र भावात घसरण झाली आहे. दिवाळी सणाला फुलांची आवक मोठ्या प्रमाणावर झाली असल्याने भाव घसरले असल्याचे झेंडू उत्पादक गजानन पवार यांनी सांगितले.

अतिवृष्टीचाही फटका

यावर्षी अतिवृष्टीनेदेखील झेंडूचे नुकसान झाले आहे. यातून वाचलेल्या झाडांना लागलेली फुले दिवाळीला विक्रीसाठी आली आहेत. यासाठी झालेला खर्च व मिळत असलेला भाव पाहता हातात काहीच पडत नसल्याचे श्री. पवार यांनी सांगितले. शहरात रविवारी सकाळीच झेंडू विक्रेते वाहनातून फुले घेऊन आले होते. उशिराने आलेल्या विक्रेत्यांना जागा मिळेल त्या ठिकाणी बसावे लागले. यामुळे महात्मा गांधी चौकासह शहरातील अकोला रस्ता, सदर बाजार, भाजीमंडई, अकोला बायपास, खटकाळी बायपास, नांदेड नाका, इंदिरा गांधी चौक, रिसाला बाजार आदी ठिकाणी विक्रेत्यांनी झेंडू विक्रीसाठी स्टॉल उभारले होते.