बदनापूर (जि.जालना) - कोरोनामुळे उदभवलेल्या परिस्थितीत हातावर पोट असणाऱ्या कामगार आणि मजुरांना मदत करण्यासाठी अनेकजण सध्या पुढे येत आहेत. नगरपंचायतीचे स्वच्छता व आरोग्य सभापती संतोष पवार यांनी सामाजिक जाणिव ठेवत आपल्या शेतातील काढलेला अकरा क्विंटल गहू गरजूंना वाटप करण्यासाठी राखीव ठेवला. सध्या घरच्या गव्हासोबत विकतचा तांदूळ आणि किराणा सामानाचे किटचे देखील त्यांनी वाटप सुरू केले आहे. 

सध्या सर्व कामे बंद असल्यामुळे रोजमजुरी करणाऱ्यांवर थेट उपासमारीची वेळ आल्याचे विदारक चित्र उभे राहिले आहे. येथील संतोष पवार यांना गावातील अनेक कुटुंबांना खरोखर अन्नधान्याची गरज असल्याचे लक्षात आले. ही बाब त्यांचा मनाला व्यथीत करून गेली. त्यानंतर संतोष यांनी शेतातील काढलेला अकरा क्विंटल गहू गरजूंना वाटप करण्यासाठी राखीव ठेवला.

हेही वाचा :  लॉकडाऊनमध्ये मजुरांच्या हाताला मिळणार काम

विकतचे तांदूळ, किराणा साहित्य आणले. त्यांनी प्रत्येकी ५ किलो गहू, २ किलो तांदूळ, १ किलो खाण्याचे गोडे तेल, ५ बिस्कीट पुडे, १ किलो मीठ, १ किलो साखर, चहा पुडा, १ डेटॉल साबण या एकंदर सामानाची किट बनविण्यास सुरवात केली. स्वतः कीटची बांधणी सुरू केली.

हेही वाचा : जालन्याच्या इतिहासात प्रथमच स्टील उद्योग बंद

या कीटचे वाटप गरजू कुटुंबाना स्वयंसेवकांच्या हस्ते केले.आपत्कालिन परिस्थितीत त्यांना पुन्हा मदत मिळवून देण्याचा मानसही त्यांनी व्यक्त केला आहे. शहरातील दानशूर व्यक्तींनी पुढे येऊन गरजुना मदत करावी असे आवाहन संतोष पवार यांनी केले आहे. 

नो फोटोसेशन... 

विशेष म्हणजे मदत देत असताना कुणीही स्वयंसेवकांनी फोटो काढू नयेत, अशी सूचनादेखील श्री.पवार यांनी केली आहे. त्यांनी मदतीच्या कीटवर कोणतेही नाव न टाकता हे वाटप केलेले आहे. या अन्नधान्यात शहरातील कित्येक कुटुंबांचे काही दिवस जरी भागणार असले तरी लॉकडाऊन वाढल्याच्या पार्श्वभूमीवर श्री.पवार हे या कुटुंबांच्या संपर्कातच राहणार आहेत. 

देशभरात कोरोनाचे संकट उभे राहिले आहे. त्यामुळे प्रत्येकाने काळजी घेणे महत्वाचे झाले आहे. कोरोनामुळे देशभरात लॉकडाऊन असल्यामुळे हातावर पोट असणाऱ्या कुटुंबाची तारांबळ उडू नये म्हणून अनेक लोक मदत करत आहेत. मी व माझ्या कुटुंबाच्या माध्यमातून केलेली जाणारी मदत हे आमचे कर्तव्य मानतो. 
- संतोष पवार 
बदनापूर