उमरी (जिल्हा नांदेड) : उमरी तालुक्यातील शिरुर येथे अज्ञात आरोपीने एका वृद्धेचा गळा चिरुन जवळपास एक लाख रुपये सोन्याचे दागिने लुटले. ही घटना मंगळवारी (ता. २५) रोजी दुपारी दोनच्या सुमारास गावातील जिल्हा परिषद शाळेच्या पाठीमागे घडली. घटनेची माहीती मिळताच धर्माबाद उपविभागीय पोलिस अधिकारी सुनील पाटील यांनी घटनास्थळी भेट दिली. तसेच त्यांच्या मार्गदर्शनाखाली उमरीचे सहाय्यक पोलिस निरीक्षक आर. टी. शेवाळे यांनीही घटनेची महिती घेऊन आरोपींचा शोध सुरू केला आहे. 

कृष्णाबाई पुंडलीक पडोळे (वय ८५) रा. शिरुर ह्या शिरुर गावात जिल्हा परिषदेच्या पाठीमागे आपल्या घरात एकटी राहत होती. मंगळवारी (ता. २५) दुपारी अज्ञात आरोपी कृष्णाबाई पडोळे यांच्या घरात जबरीने घुसले. यावेळी श्रीमती पडोळे यांना त्यांनी पाणी मागितले. घरात बसले तिच्याशी गप्पा केल्या. त्यानंतर तिचा गळा चिरून खून केला. त्यानंतर तिच्या कनातील व गळ्यातील सोन्याचे दागिणे लुटले. 

वरिष्ठ पोलिस अधिकाऱ्यांची घटनास्थळाला भेट

सायंकाळी उशिरा शेजाऱ्यांना हा पत्ता लागला. त्यांनी घरात डोकावून पाहिले तर कृष्णाबाई हिचा मृतदेह रक्ताच्या थारोळ्यात दिसला. या घटनेची माहिती गावकऱ्यांनी उमरी पोलिसांना दिली. त्यानंतर सहाय्यक पोलिस निरीक्षक आर. टी. शेवाळे यांनी घटनास्थळी धाव घेतली. त्यानंतर त्यांनी आपले वरिष्ठ धर्माबादचे उपविभागीय पोलिस अधिकारी सुनिल पाटील यांना कळविले. त्यांनीही घटनास्थळ गाठले. कृष्णाबाई यांचा मृतदेह उमरीच्या सरकारी रुग्णालयात दाखल केला. 

हेही वाचा - वाचा : नांदेडसह परभणी व हिंगोली जिल्ह्यातील कर्तृत्ववान व्यक्तींचा होणार गौरव : कोठे आणि कधी

उमरी पोलिस ठाण्यात खून व लुटमारीचा गुन्हा

कृष्णाबाई हिच्या मृतदेहावर बुधवारी (ता. २६) दुपारपर्यंत उत्तरीय तपासणी करण्यात आली नव्हती. या प्रकरणी साईनाथ पडोळे यांच्या फिर्यादीवरुन उमरी पोलिस ठाण्यात खून व लुटमारीचा गुन्हा दाखल करण्यात आला आहे. तपास सहाय्यक पोलिस निरीक्षक श्री. शेवाळे करत आहेत. या घटनेमुळे या गावात भितीचे वातावरण पसरले असून मारेकऱ्याच्या शोधात पोलिस पथक तैणात केल्याचे डीवाएसपी सुनिल पाटील यांनी दिली. मयत वृध्देस विवाहित पाच मुली असुन त्यांना एकुलता एक मुलगा होता. त्याचे काही वर्षापूर्वीच मृत्यू झाल्याचे सांगण्यात आले.