माजलगाव : अतिरिक्त उस प्रश्नावर आणि या उसांमुळेच गेवराई तालुक्यातील शेतकरी आत्महत्या प्रकरणी शेतक-यांमध्ये संतापाचे वातावरण असुन अतिरिक्त उस प्रश्न चिघळल्याने संतापलेल्या शेतक-यांनी आनंदगाव येथे उसाच्या फडामध्ये साखर आयुक्त व प्रादेशिल संचालकांची प्रतिकात्मक प्रेतयात्रा काढत बुधवारी (ता. 25) आक्रोश व्यक्त केला. गेवराई तालुक्यातील शेतक-याने उसाच्या फडात उस पेटवुन देउन आत्महत्या केली.

याप्रकरणात दोषी असणारे साखर आयुक्त व प्रादेशिक सहसंचालक यांचेवर मनुष्यवधाचा गुन्हा दाखल करण्यात यावा तसेच शासनाने 1 मे पासुन गाळप करण्यात येणा-या उसाचा कारखानदारास प्रतिटन 200 रूपये देण्याचा निर्णय घेतला आहे तो रद् करून प्रतिटन 200 रूपयांप्रमाणे शेतक-यांना ही रक्कम देण्यात यावी या इतर मागण्यांसाठी शेतकरी संघर्ष समितीच्या वतीने गंगाभिषण थावरे यांच्या नेतृत्वाखाली आनंदगाव येथे बुधवारी सकाळी साखर आयुक्त व प्रादेशिक सहसंचालक यांची प्रतिकात्मक प्रेतयात्रा काढली. दरम्यान तालुक्यामध्ये निर्माण झालेला अतिरिक्त उसाचा प्रश्न कारखानदारांनी व प्रशासनाने मार्गी लावावा अशी मागणीही श्री. थावरे यांनी केली आहे.