पाचोड - लग्नाहून दुचाकीने गावी परतणाऱ्या पितापुत्रास भरधाव वेगातील अज्ञात वाहनाने जोराची धडक दिल्याने त्यांचा जागीच मृत्यू झाल्याची घटना धूळे-सोलापूर राष्ट्रीय महामार्गावर दाभरूळ (ता. पैठण) जवळ घडली असून पाचोड (ता. पैठण) पोलिसांनी गुरुवारी (ता. १६) अज्ञात वाहनाविरुद्ध गुन्हा दाखल केला.

यासंबंधी अधिक माहिती अशी, रांजणगाव शेणपुंजी (ता.गंगापुर) येथील सलीम बादशाहा सय्यद व मुलगा अनिस सलीम सय्यद हे बुधवारी (ता. १५) यामाहा मोटार सायकल (क्र. एम एच - २०एफ जे- ८३११) ने राणी उंचेगाव (ता. अंबड जि. जालना) येथे लग्नासाठी गेले होते, ते लग्नाहून परत येत असताना संध्याकाळी चार वाजेच्या सुमारास रोहीलगड फाट्याहून वळण घेत असताना दाभरूळ फाट्यानजीक भरधाव वेगातील अज्ञात वाहनाने त्यांच्या दुचाकीस जोराची धडक दिल्याने ते जागीच ठार झाले.

त्यांना उपस्थितांनी पाचोडच्या ग्रामीण रुग्णालयात उपचारार्थ दाखल केले असता वैद्यकिय अधिकारी डॉ. विक्रम ठाकरे यांनी त्यांस तपासून मृत घोषित केले. धडक देणाऱ्या वाहनचालकाने वाहन थांबवून कोणतीही मदत न करता व अपघा ताची पोलिसांना खबर न देता वाहनासह घटनास्थळाहून पळ काढला.

अज्ञात व्यक्तीने मृत सलीम सय्यद यांच्या मोबाईलवरून त्यांच्या घरी या घटनेची कल्पना दिली. ही माहिती मिळताच दुसरा मुलगा अलीम सलीम सय्यद यांने पाचोड येथे धाव घेऊन उत्तरणीय तपासणीनंतर मृतदेह ताब्यात घेऊन गावी दफनविधी केला व गुरुवारी (ता.१६) पाचोड पोलीसात तक्रार दाखल केली. सदर तक्रारीवरून पाचोड पोलिसांनी अज्ञात वाहनाविरुद्ध विविध कलमाखाली गुन्हा दाखल केला .

या प्रकरणाचा पुढील तपास सहाय्यक पोलीस निरीक्षक शरदचंद्र रोडगे करीत आहे.