आष्टी (जि. बीड) : तालुक्यातील बारामती-पैठण मार्गावर खाकाळवाडी शिवारात भाजीपाला विक्रीसाठी दुचाकीवरून जाणाऱ्या बाप-लेकाचा समोरुन भरधाव आलेल्या कारने दिलेल्या धडकेत जागीच मृत्यू झाला. शुक्रवारी (ता. दोन) सकाळी साडेसात वाजण्याच्या सुमारास ही दुर्दैवी घटना घडली. अरूण बापूराव औटे (वय ५४ वर्षे) व सुरज अरूण औटे (वय २४ वर्षे) अशी मृतांची नावे आहेत.

तालुक्यातील नांदा येथील अरूण बापूराव औटे व सुरज अरूण औटे हे शेतकरी पितापुत्र दोघेही शुक्रवारी सकाळी नेहमीप्रमाणे शेतातील भाजीपाला विक्रीसाठी नांद्यावरुन कड्याकडे दुचाकीवरून येत होते. खाकाळवाडी शिवारात कड्याकडून मिरजगावकडे जाणार्या कारने (क्रमांक एम.एच.जीयु-९९६७) त्यांच्या दुचाकीला समोरासमोर जोराची धडक झाली.

या भीषण अपघातात दुचाकीवरील बाप-लेकाचा गंभीर दुखापत होऊन जागीच मृत्यू झाला. अपघाताची माहिती मिळताच कडा पोलिस चौकीच्या कर्मचा-यांनी तात्काळ घटनास्थळी धाव घेऊन मदत केली. सर्वसामान्य शेतकरी कुटूंबातील दोघाही कर्त्या पितापूत्राचा अपघातात दुर्देवी मृत्यू झाल्याने औटे कुटुंबियांवर दुःखाचा डोंगर कोसळला असून तालुक्यात हळहळ व्यक्त करण्यात येत आहे.