हिंगोली : तालुक्‍यातील नरसी नामदेव येथील संत नामदेव महाराज यांच्या 479 व्या जयंती महोत्‍सवानिमित्त शनिवारपासून (ता. 2) ते शनिवारपर्यंत (ता. 9) अखंड हरिनाम सप्‍ताहानिमित्त विविध कार्यक्रमांचे आयोजन करण्यात आले असून सप्ताहाच्या कार्यक्रमास सुरवात झाली आहे.

त्‍यानिमित्त दररोज सकाळी चार ते सहा काकडा, आठ ते अकरा दुपारी दोन ते चार नामदेव महाराज गाथा पारायण सोहळा, सायंकाळी चार ते पाच प्रवचन, पाच ते सहा हरिपाठ, रात्री आठ ते दहा कीर्तन व नंतर हरिजागर कार्यक्रम सुरू आहेत. सप्ताहात दररोज सकाळी, दुपारी व सायंकाळी अन्नदानदेखील केले जात आहे. शुक्रवारी (ता. 8) सकाळी सात वाजता एकादशीनिमित्त होणाऱ्या विशेष महापुजेचे मानकरी तहसीलदार गजानन शिंदे व रामरतन शिंदे यांच्या उपस्‍थितीत महापूजा होणार आहे. दरम्‍यान, सप्ताहात सायंकाळी चार ते पाच या वेळात राजू नागरे, ज्ञानबा महाराज, शिवाजी महाराज डांगे, भगवान महाराज गिलोरी यांचे प्रवचन झाले. तर बुधवारी (ता. 6) उमाकांत महाराज नरसी, सुभाष महाराज जांभरून यांचे प्रवचन होणार आहे. शनिवारपासून रात्री आठ ते दहा या वेळात सुरू झालेल्या कीर्तनात शिवसांब महाराज नरसी, केदारलिंग महाराज कडती, दामोधर महाराज वैजापूर यांचे कीर्तन झाले आहे. बुधवारपासून (ता. 6) बंडू महाराज बीडकर, ग्यानेदव महाराज मकोडी, रमेश महाराज मगर यांचे कीर्तन होणार आहे.

शुक्रवारी (ता. 8) दुपारी दोन ते चार या वेळात संत नामेदव महाराज यांच्या पालखीची नगरप्रदक्षिणा होणार आहे. शनिवारी (ता. 9) भागवताचार्य भारत महाराज बेंगाळ कोळसेकर यांचे नऊ ते अकरा या वेळात काल्याचे किर्तन होणार आहे. त्‍यानंतर महाप्रसादाचे वाटप केले जाणार आहे. या कार्यक्रमाचा लाभ घेण्याचे आवाहन संत नामदेव महाराज मंदिर संस्‍थान, परिसरातील भावीक भक्‍त मंडळी व ग्रामस्‍थांतर्फे करण्यात आले आहे.