रेणापूर (जि.लातूर) : लातूर जिल्ह्यातील मोटेगाव (ता. रेणापूर) परिसरात रविवारी (ता.२८) दुपारी तीनच्या सुमारास झालेल्या ढगफुटीने नदी-नाल्यांना पाणी येऊन जवळपास पाचशे हेक्टरांवर पेरलेले सोयाबीन वाहून गेले. जोरदार पावसामुळे अनेकांची वळणे फुटली, शेतातील माती वाहून जाऊन अनेक झाडे उन्मळून पडली. सध्या शेतकऱ्यांच्या शेतात तीन ते चार फूट पाणी साचले आहे. अतिवृष्टीमुळे शेकडो शेतकऱ्यांना लाखो रुपयांचा फटका बसला आहे.

रविवारी दुपारी तीनच्या सुमारास मोटेगाव, चाडगाव (ता. रेणापूर) परिसरात अचानक मोठा पाऊस होऊन ढगफुटी झाली. या पावसामुळे मोटेगाव परिसरातील माणिक सोमवंशी, राजाभाऊ सोमवंशी, सुनील सोळुंके, शिवाजी सोमवंशी, सचिन सोमवंशी यांच्यासह जवळपास दीडशे शेतकऱ्यांच्या पाचशे हेक्टर क्षेत्रावरील पेरलेले सोयाबीन वाहून गेले. नव्याने टाकलेले बांध फुटून शेतातील माती वाहून गेली. अनेक ठिकाणची झाडे उन्मळून पडली. शिवाय अनेकांच्या गोठ्यांत पाणी शिरून गोठ्यात ठेवलेले खत व इतर साहित्याचे मोठे नुकसान झाले आहे.

लातूर जिल्ह्यातील २१ हजार शेतकऱ्यांच्या बांधावर पोहचले खत, बियाणे

मोटेगावलगतच्या नदीला व चोरंगळा, धनगरवाडा यासारख्या लहान ओढ्यांना पुराचे स्वरूप आले होते. जिकडे पाहावे तिकडे शेतात पाणी साचलेले दिसत होते. सध्या सर्व शेतात तीन ते चार फूट पाणी साचले आहे. अनेकांच्या शेतातील गोठ्यात असलेली जनावरे सध्या पाण्यातच उभी आहेत. पेरलेले सोयाबीन न उगवल्याने शेतकरी अगोदरच विवंचनेत असताना परत आता ढगफुटीने शेतकरी पार धुतला गेला आहे. अतिपावसामुळे शेतीचे मोठ्या प्रमाणात नुकसान झाल्याने शेतकऱ्यांवर नवीनच मोठे आर्थिक संकट उभे राहिले आहे. सर्वत्र मोठा पाऊस झाला असला तरी कोठेही जीवितहानी झालेली नाही, अशी माहिती रेणा खरेदी-विक्री संघाचे अध्यक्ष माणिक सोमवंशी यांनी दिली.