परभणी : ‘कोरोना’ विषाणुचा प्रादुर्भाव झाल्यानंतर संपूर्ण देशात ‘लॉकडाऊन’ करण्यात आले आहे. या ‘लॉकडाऊन’चा विपरित परिणाम आता दिसू लागला आहे. शहरातील अनेक हातावर पोट असणारे किंवा भिकाऱ्यांच्या जेवणाचे वांदे होऊन बसले आहेत. याचा विचार करून शुक्रवार (ता.२७) पासून परभणी पोलिसांनी पुढाकार घेत शहरात अन्नदान सुरु केले आहे.

‘कोरोना’ विषाणूचा प्रादुर्भाव रोखण्यासाठी सर्वस्तरावर प्रयत्न होत आहेत. या प्रादुर्भावाचा सामना करण्यासाठी देशाचे पंतप्रधान नरेंद्र मोदी यांनी संपूर्ण देशात २१ दिवसाचा ‘लॉकडाऊन’ जाहीर केला आहे. यामुळे सर्वच उद्योग, व्यापार व इतर कामे बंद ठेवून नागरिकांना घरीच थांबण्याचे आदेश देण्यात आले आहेत. ‘लॉकडाऊन’चा विपरित परिणाम दिसण्यास सुरुवात झाली आहे. हातावर पोट असणाऱ्या व दिव्यांग किंवा भिकारी लोकांची यामुळे पुर्ती गैरसोय होऊ लागली आहे. अनेकांना सुरुवातीच्या एक - दोन दिवस उपाशी रहावे लागले. त्यामुळे काही सामाजिक दायीत्व स्विकारलेल्या नागरिकांनी अश्या लोकांसाठी जेवणाची व्यवस्था करून दिली होती. या कामात आता परभणी पोलिस दलही मागे राहिले नाही. 

हेही वाचा - ‘लॉकडाऊन’ने खासगी दवाखाने बंद

मोफत जेवण वाटप
परभणी पोलिसांच्यावतीने दररोज सकाळी व रात्रीच्यावेळी मोफत जेवण वाटप केले जात आहे. या उपक्रमाला शुक्रवार पासून सुरुवात करण्यात आली आहे. पोलिसांच्या गाडीत एका मोठ्या भांड्यात उच्च प्रतिच्या तांदूळाची खिचडी करून ती गरजवंतांना पुरविली जात आहे. शहरातील रेल्वेस्थानक, बसस्थानक, धार्मिक स्थळे, व इतर ठिकाणी बसलेल्या या बेघरांना या मोफत भोजनचा लाभ दिला जात आहे.

स्वच्छतेसाठी हॅन्डवॉश आणि सॅनिटायझरही...
पोलिसांच्यावतीने केवळ भोजनच वाटप केले जात आहे असे नाही तर ज्यांना हे भोजन दिले जात आहे. अश्या लोकांना अगोदर हॅन्डवॉश देऊन त्यांना हात धुण्यास सांगितले जात आहे. त्यानंतर सॅनिटायझर ही दिले जात असल्याचे दिसत आहे.

हेही वाचा - ‘लॉकडाऊन’ ने गव्हाची चढ्या दराने विक्री !

याच गाडीवरून नागरीकांना सुचना
पोलिसांच्यावतीने मोफत अन्नदान केले जात आहे. त्याच गाडीतून घराबाहेर पडणाऱ्या नागरीकांनाही सुचना दिल्या जात आहेत. नागरीकांनी संचारबंदीच्या काळात घरात रहावे. कोरोना विषाणुचा प्रादुर्भाव रोखण्यासाठी घरात राहूनच प्रशासनास सहकार्य करावे अश्या सुचना देखील दिल्या जात आहेत.