शिरुर कासार (बीड) : जिल्ह्यात विविध ठिकाणी झालेल्या दोन अपघातात चौघे ठार झाले. पहिला अपघात शुक्रवारी (ता. 14) रात्री 11 वाजता परिसरातील काकडहिराजवळ झाला. दुसरा अपघात रायमोह (ता. शिरुर कासार) येथे शनिवारी (ता. 15) पहाटे एक अपघात तागडगाव (ता. शिरुर कासार) फाट्यावर घडला.

शुक्रवारी रात्री बीडजवळील एका हॉटेलवर जेवण करुन दोघेजण दुचाकीवरुन जात असताना तळेगाव - काकडहिरा रस्त्यावर दुचाकीला अज्ञात वाहनाने धडक दिली. यामध्ये सुनिल किसन जाधव (वय 26, रा. मन्यारवाडी) व तुकाराम चिकने (रा. गंगावाडी) हे दोघे गंभीर जखमी झाले. त्यांना उपचारासाठी जिल्हा रुग्णालयात आणत असताना रस्त्यातच त्यांचा मृत्यू झाला.

दुसरी घटना तागडगाव (ता. शिरुर कासार) येथे शनिवारी पहाटे घडली. नामदेव महादेव गवळी (वय 28, रा. गोमळवाडा) व विठ्ठल लक्ष्मण जायभाये (वय 50, रा. पिंपळनेर) हे दोघे दुचाकीवरुन (क्रमांक एम. एच. 17, टी. 2806) जात असताना अज्ञात वाहनाने जोराची धडक दिली. यामध्ये दोघेही जागीच ठार झाले. या प्रकरणी पोलिस ठाण्यात नोंद करण्यात आली आहे.