फुलंब्री - तालुक्यातील सुमारे दीड ते दोन हजार लोकसंख्या असलेल्या शेलगाव खुर्द या छोट्याशा गावातील तरुण शेतकऱ्याने चाळीस गुंठ्यांत टोमॅटोची लागवड करून लाखोंचे उत्पन्न घेतले असून, या गावरान टोमॅटो पिकाला आता थेट मध्यप्रदेशातून मागणी होत आहे. आठवड्याला सुमारे वीस क्विंटल टोमॅटोची विक्री होत असून यातून बळिराजा आर्थिक समृद्ध झाल्याचे चित्र आहे.

बबन मुकुंदा तुपे (रा.शेलगाव खुर्द, ता. फुलंब्री) या शेतकऱ्याने सांगितले की, आतापर्यंत १४० कॅरेट टोमॅटो विकले असून यातून साडेतीन लाख रुपयांचा नफा कमविला आहे. अजूनही टोमॅटोच्या झाडाची क्षमता चांगली असल्यामुळे आणखी अडीच ते तीन लाख रुपयांचे उत्पन्न होणार आहे. त्यामुळे एकंदरीत चार महिन्यांत चाळीस गुंठ्यांत सुमारे साडेसहा लाख रुपयांचे उत्पन्न हाती येणार असल्याचे शेतकरी तुपे म्हणाले.

शेलगाव खुर्द येथील गट नंबर ८४ मध्ये चाळीस गुंठ्यांमध्ये टोमॅटोची २५ एप्रिल २०२३ रोजी लागवड केली होती. एप्रिल महिन्यात लागवड केलेले टोमॅटो बहुतेक वेळा करपा व इतर रोगांनी नष्ट होतात. या संकटांवर मात करून शेतकरी तुपे यांनी चाळीस गुंठ्यांत टोमॅटोची लागवड केली. त्यावेळी टोमॅटो तीन-चार रुपये किलोने विकले जात होते.

पुढील बाजार भावाचा विचार न करता त्यांनी पिकासाठी मेहनत घेतली. चाळीस गुंठ्यांतील टोमॅटोला जवळपास लाखभर रुपये खर्च केला. मात्र, त्यातून आजपर्यंत साडेतीन लाखांचे उत्पन्न मिळाले आहे. अद्यापही सुमारे दीडशे कॅरेट उत्पन्न निघणार आहे. आतापर्यंत निघालेल्या टोमॅटोला मध्यप्रदेश येथील बाजारात चांगला भाव मिळत असल्याने तिथे माल पोहोच केल्याचे या शेतकऱ्याने सांगितले.

लहान मुलाप्रमाणे घेतली काळजी

शेतकऱ्याने सदरील टोमॅटोचा प्लॉट चांगला आणण्यासाठी भरपूर मेहनतही घेतली. शेतात तण होऊ न देण्यासह विविध काळजी घेत द्रवरूप खते व फवारणी नियमितपणे चालू ठेवले. चांगला प्लॉट आणून येणाऱ्या-जाणाऱ्या ग्राहकांचे व व्यापाऱ्याचे लक्ष्य वेधले. सकाळपासून सायंकाळपर्यंत लहान मुलाप्रमाणे या टोमॅटोच्या झाडांची निगा राखल्याने याचा त्यांना फायदा झाला.

एप्रिल महिन्यामध्ये टोमॅटोची लागवड केली. त्यावेळेस उन्हाचा तडाखा जाणवत होता. त्यामुळे रोपे जगविणे कठीण होते. जमिनीची धूप कमी होण्यासाठी विविध उपाययोजनाही केल्या. आज टोमॅटोला चांगला बाजारभाव मिळाल्याने मेहनतीचे चीज झाले.

- बबन तुपे (शेतकरी, शेलगाव खुर्द ता.फुलंब्री)