औरंगाबाद - कचराकोंडीनंतर गेल्या दीड वर्षात नारेगावप्रमाणे शहराच्या चारही बाजूंनी कचऱ्याचे नवे डोंगर तयार झाले आहेत. पावसाळा सुरू झाल्यामुळे या कचऱ्याच्या ढिगाऱ्यांचा नागरिकांना त्रास सहन करावा लागणार आहे. त्यामुळे सुमारे ४० हजार टन कचऱ्याची स्क्रीनिंग करण्यासाठी चाचपणी सुरू आहे. त्यासाठी सुमारे दोन कोटी रुपये खर्च अपेक्षित आहे.

कचराकोंडीनंतर महापालिकेने शहर परिसरात चार ठिकाणी कचरा प्रक्रिया प्रकल्प उभारण्याचा निर्णय घेतला. त्यासाठी शासनाने ९१ कोटी रुपयांचा घनकचरा व्यवस्थापनाचा प्रस्ताव मंजूर केला; मात्र सव्वा वर्ष उलटले तरी प्रकल्पांचे काम पूर्ण झालेले नाही. त्यामुळे प्रक्रिया प्रकल्पांच्या शेजारीच पत्र्याचे तात्पुरते शेड तयार करून चिकलठाणा, पडेगाव, हर्सूल, कांचनवाडी येथे कचरा साठविण्यात आला. या कचऱ्याची दुर्गंधी सुटू नये यासाठी फक्त औषध फवारणी करण्यात आली; मात्र गेल्या सव्वा वर्षात या चारही ठिकाणी हजारो टन कचऱ्याचे डोंगर तयार झाले आहेत. विशेष म्हणजे महापालिका ८० टक्‍क्‍यांपर्यंत कचऱ्याचे ओला व सुका असे वर्गीकरण होत असल्याचा दावा करीत असली तरी हा कचरा मिक्‍स आहे. दरम्यान, चिकलठाणा येथील प्रक्रिया प्रकल्प लवकरच सुरू होणार असल्यामुळे तेथील कचरा प्रक्रिया प्रकल्पात नेला जाईल, असे सांगण्यात आले होते; मात्र आता चारही ठिकाणच्या कचऱ्यावर प्रक्रिया करण्यासाठी स्वतंत्र कंत्राट देण्यासाठी चाचपणी केली जात आहे. चार प्रक्रिया प्रकल्पांमध्ये सुमारे ४० हजार टन कचरा पडून आहे. 

त्यावर बायोमायनिंग करण्यात आल्यामुळे कचरा सडलेला आहे. त्यामुळे फक्त स्क्रीनिंग केल्यास प्रश्‍न सुटू शकतो, असे घनकचरा व्यवस्थापन विभागाचे प्रमुख नंदकिशोर भोंबे यांनी सांगितले.

२५ दिवसांत सफाया 
महापालिका अधिकाऱ्यांनी लातूरसह इतर ठिकाणी कचऱ्याच्या स्क्रीनिंग प्रक्रियेची पाहणी केली आहे. लातूरप्रमाणे काम झाल्यास अवघ्या २५ दिवसांत सध्या पडून असलेल्या कचऱ्यावर प्रक्रिया होऊ शकते.