परळी वैजनाथ (जि. बीड) - राज्याचे राज्यपाल भगतसिंह कोश्यारी शुक्रवारी (ता.१९) जिल्हा दौऱ्यावर आले आहेत. दुपारी अंबाजोगाईत त्यांनी जिल्हा सैनिक कल्याण मंडळ व रेड क्रॉस सोसायटी यांच्या अधिकाऱ्यासमवेत बैठक घेतली. योगेश्वरी देवीचे दर्शन घेतले. त्यानंतर येथील बारा ज्योतिर्लिंगापैकी पाचवे ज्योतिर्लिंग असलेल्या प्रभू वैद्यनाथाचे पूजन करून दर्शन घेतले.

राज्याचे राज्यपाल भगतसिंह कोश्यारी हे शुक्रवारी अंबाजोगाई येथून दुपारी चार वाजण्याच्या सुमारास येथे दाखल झाले. ४.२० मिनीटांनी येथील बारा ज्योतिर्लिंगापैकी एक असलेल्या प्रभू वैद्यनाथाची पूजा, आरती करून श्रावण पर्वकाळात प्रभू वैद्यनाथाचे दर्शन घेतले. यावेळी वैद्यनाथ देवस्थान ट्रस्टच्या वतीने राज्यपालांचा सत्कार करण्यात आला. वैद्यनाथाची प्रतिमा देऊन राज्यपालांचा देवस्थान कमिटीने सत्कार केला. यावेळी वैद्यनाथ देवस्थान ट्रस्टचे विश्वस्त राजेश देशमुख, प्रा. प्रदीप देशमुख, प्रा. बाबासाहेब देशमुख, विजयकुमार मेनकुदळे, डॉ. गुरुप्रसाद देशपांडे, नंदकिशोर जाजू, नागोराव देशमुख, रघुवीर देशमुख, जिल्हाधिकारी राधा बिनोद शर्मा यांच्यासह प्रशासनातील वरिष्ठ अधिकारी उपस्थित होते.