केज : पंचेवीस वर्षीय तरूणाने देवदर्शन करून मंदिरातून बाहेर पडत असलेल्या वृद्ध आजोबांवर धारदार कोयत्याने हल्ला केल्याची घटना मंगळवार (ता.०५) रोजी सकाळी साडेसात वाजण्याच्या सुमारास केज शहरातील कानडी रस्त्यालगत असलेल्या सिद्धी विनायक गणेश मंदिराजवळ घडली. या हल्ल्यात जखमी झालेल्या आजोबाचा जागीच मृत्यू झाला आहे.

घटनेनंतर हल्लेखोर तरूण हा स्वतः पोलीस ठाण्यात हजर झाला आहे. या हल्ल्यात मृत्यू झालेल्या आजोबाचे नाव गिरधारी किसनलाल शिल्लक (वय-६०) असे आहे. नेहमी गर्दीने गजबजलेल्या भागात घडल्याने केज शहरात एकच खळबळ उडाली आहे.

शहरातील कानडी रस्ता परिसरातील गिरधारी शिल्लक हे मंगळवारी सकाळी नेहमीप्रमाणे मंगळवार सकाळी साडेसात वाजण्याच्या सुमारास जवळच असलेल्या सिद्धी विनायक गणेश मंदिरात मंदिरात देवदर्शनासाठी गेले होते.

ते देवदर्शन करून मंदिराच्या बाहेर येत होते. याच सुमारास मंदिराच्या बाजूला दबा धरून बसलेला त्यांच्या पुतण्याचा मुलगा नात्याने त्यांचा चुलत नातू रोहित रतन शिल्लक (वय-२५) याने आजोबांना मंदिराच्या जवळ असलेल्या आडबाजूला ओढत नेऊन धारदार शस्त्राने डोक्यात व मानेवर सलग तेरा सपासप वार केले.

या हल्ल्यात गिरधारी शिल्लक यांची डोक्याची कवटी फुटून मानेच्या शिरा तुटल्याने त्याच त्यांचा जागीच मृत्यू झाला. घटनेनंतर रोहीत शिल्लक हा स्वतः केज पोलीस ठाण्यात जाऊन हजर झाला. या खूनाच्या घटनेची माहिती मिळताच पोलीस उपनिरीक्षक आनंद शिंदे, पोलीस उपनिरीक्षक वैभव सारंग यांनी सहकारी पोलीस कर्मचाऱ्यांसह घटनास्थळी दाखल होऊन मृतदेह उपजिल्हा रुग्णालयात पाठवून दिला. या प्रकरणी पोलीस ठाण्यात अद्यापपर्यंत गुन्हा दाखल करण्यात आला नव्हता.