नायगाव (जि.उस्मानाबाद) : पालकमंत्री आपल्या शेतीच्या नुकसानीची पाहणी करतील, या आशेने त्यांची वाट बघत थांबलेल्या शेतकऱ्यांचा अखेर हिरमोड झाला. कारण पालकमंत्री शंकरराव गडाख (Shankarrao Gadakh) आले आणि दौरा आटोपता घेत निघुन गेले. त्यामुळे शेतकऱ्यांचा अपेक्षा भंग झाला. बुधवारी (ता.२९) उस्मानाबाद जिल्ह्याचे पालकमंत्री शंकरराव गडाख यांनी कळंब (Kalamb) तालुक्याचा दौरा केला. या तालुक्यात पुरामुळे नुकसान झालेल्या वाकडी, सौंदाण या गावांची त्यांनी पाहणी केली. आता हे पालकमंत्री आपल्याकडेही येतील म्हणून नायगाव (Naigaon) महसूल मंडळातील नायगावसह पाडोळी, बोरगाव, रायगाव्हण या गावातील शेतकरी त्यांची वाट पाहात बसले होते. या गावात अतिवृष्टीमुळे नायगाव, पाडोळी मार्गावर अर्धा पूल वाहून गेला. पिकांचेही नुकसान झाले. या (Osmanabad) नुकसानीची माहिती, देऊन व्यथा मांडता येईल असे या शेतकऱ्यांना वाटले होते. परंतू पाहणी करण्यासाठी आलेले पालकमंत्री गडाख आले आणि आपला दौरा आटोपता घेत निघुन गेले. त्यामुळे त्यांची आतुरतेने वाट पाहत असलेल्या शेतकऱ्यांचा अपेक्षा भंग व हिरमोड झाला.

पदरातले हिरावले

या भागातील शेतकऱ्यांचे पदरात आलेले पिक हिरावण्याची ही सलग तिसरी वेळ आहे. मागील वर्षीही परतीच्या पावसाने पदरात आलेले पीके हिरावले होते. नुकसान होऊनही गेल्या दोन वर्षांपासून येथील शेतकऱ्यांना विमा मिळालेला नाही. यातच सोमवारी व मंगळवारी झालेल्या अतिवृष्टीमुळे हातातोंडाशी आलेला घास हिरावला आहे. या अतिवृष्टीमुळे काढणीला आलेल्या सोयाबीन पिकासह उडीद, मूग, ऊसासह शेतीचे मोठे नुकसान झाले आहे. त्यामुळे परिसरातील जनजीवन विस्कळीत होऊन शेतकरी उद्ध्वस्त झाले आहे. सरकारने याची दखल घेऊन तात्काळ मदत करावी अशी मागणी शेतकऱ्यांनी केली आहे.