लातूर  : महाराष्ट्र आरोग्य विज्ञान विद्यापीठाचे उपकेंद्र, लातूर येथे सुरू करण्याबाबतचा प्रस्ताव आमच्याकडे आला आहे. त्याला तत्वत: मान्यता देण्यात आली आहे, अशी माहिती विद्यापीठाचे कुलगुरू डॉ.दिलीप म्हैसेकर यांनी ‘सकाळ’ला दिली. या निर्णयामुळे लातूरबरोबरच नांदेड, उस्मानाबाद, सोलापूर या चार शहरांतील हजारो विद्यार्थ्यांची ‘नाशिक-वारी’ वाचणार आहे. महाराष्ट्र आरोग्य विज्ञान विद्यापीठाचा २२ वा वर्धापनदिन सोहळा नुकताच झाला.

या सोहळ्यातही डॉ.म्हैसेकर यांनी लातूरात आरोग्य विज्ञान विद्यापीठाचे विभागीय केंद्र होईल, याबाबतचे सूतोवाच केले होते. या संदर्भात त्यांच्याशी संपर्क साधला असता त्यांनी या प्रस्तावाला मान्यता दिली आहे. विद्यापीठाच्या व्यवस्थापन परिषदेत हा विषय ठेवला जाणार आहे. त्यानंतर याची अंतिम घोषणा होईल, अशी माहिती दिली. विलासराव देशमुख शासकीय वैद्यकीय विज्ञान संस्थेचे अधिष्ठाता डॉ.गिरीश ठाकूर आणि विद्यापीठाच्या सिनेटचे सदस्य डॉ. डी. एन. चिंते यांनी याबाबचा प्रस्ताव विद्यापीठाकडे दिला असल्याचेही ते म्हणाले.

आईला पोटगी न देणाऱ्या मुलाविरुध्द गुन्हा दाखल करा, पोलिसांना आदेश

डॉ. चिंते म्हणाले, लातूरात या विद्यापीठाचे उपकेंद्र सुरू करावे म्हणून गेल्या १५ वर्षांपासून आमचा पाठपुरावा सुरू आहे. या खात्याचे मंत्री अमित देशमुख यांच्याकडेही आम्ही मागणी केली. या केंद्रांतर्गत प्रिव्हेंशन ॲन्ड मॅनेजमेंट ऑफ कम्यूनिकेबल डिसिज या विषयाअंतर्गत संशोधन केंद्र उभारून रोजगार निर्मिती करावी, असे आम्ही प्रस्तावात नमूद केले आहे. डॉ.ठाकूर म्हणाले, लातूरात हे उपकेंद्र होणे गरजेचे आहे. याचा विचार करून शहराच्या मध्यवर्ती भागात असलेल्या विलासराव देशमुख शासकीय वैद्यकीय विज्ञान संस्थेच्या आवारातील जागा या उपकेंद्रासाठी दिली जाणार आहे.

उदगीरात तीन नव्या पॉझिटिव्ह रूग्णांमुळे पुन्हा खळबळ, नागरिकांमध्ये भीती

लातूरात दोन उपकेंद्रे
दिवंगत माजी मुख्यंमत्री विलासराव देशमुख यांनी लातूरपासून जवळच असलेल्या पेठ येथे स्वामी रामानंद तीर्थ मराठवाडा विद्यापीठाचे उपकेंद्र आणण्याचा निर्णय घेतला. त्यावेळी ते मुख्यमंत्री होते. लातूरात २००७-०८मध्ये विद्यापीठाच्या या उपकेंद्राला सुरवात झाली. त्यानंतर आता त्यांचे पुत्र आणि वैद्यकीय शिक्षणमंत्री अमित देशमुख यांनी आरोग्य विज्ञान विद्यापीठाचे विभागीय उपकेंद्र लातूरात आणण्यासाठी पुढाकार घेतला आहे. त्यामुळे लातूरात लवकरच दोन विद्यापीठांचे उपकेंद्रे पाहायला मिळणार आहेत.

आरोग्य विज्ञान विद्यापीठाची मुंबई, पुणे, नागपूर, औरंगाबाद, कोल्हापूर ही पाच उपकेंद्रे सध्या कार्यरत आहेत. पण, कोल्हापूर हे केंद्र सोलापूरसह इतर शहरातील विद्यार्थी-प्राध्यापकांना दूर पडत होते. संलग्नीत महाविद्यालयांमधील विद्यार्थ्यांच्या कार्यालयीन कामातील अडचणी लवकर सुटाव्यात म्हणून लातूर येथे उपकेंद्र सुरू करण्याच्या प्रस्तावाला मान्यता दिली जाणार आहे.
- डॉ. दिलीप म्हैसेकर, कुलगुरू