सोयगाव (जि,औरंगाबाद) ः सोयगावसह तालुक्‍यात सोमवारी (ता. नऊ) दुपारपासून दमदार आणि मध्यम स्वरूपाचा पाऊस झाला. वाफशा अभावी शेतीकामे ठप्प झाली होती. दरम्यान, बनोटी भागातील वनगाव, घोरकुंड भागांत पावसाचा जोर अधिक असल्याने या भागातील नदी नाल्यांना पूर आला होता.

या पावसात वनगाव येथील नदीने धोक्‍याची पातळी ओलांडली होती. त्यामुळे ग्रामस्थ पुराच्या पाण्यात अडकले होते. पूर ओसरल्यानंतर त्यांचा मार्ग मोकळा झाला.
सोयगाव परिसरातही काही भागांत दमदार पाऊस झाल्याने भरात आलेल्या खरीप पिकांचे नुकसान झाले आहे. बाजरी आणि ज्वारीची पिके पाण्यात गेली. त्यामुळे मोठे नुकसान झाले आहे. सोयगाव परिसरातही दुपारपासून संततधार कमी अधिक स्वरूपाचा पाऊस रात्री उशिरापर्यंत सुरू होता.