औरंगाबाद: बीड जिल्ह्यात नरेगामध्ये गैरप्रकार झाल्याच्या प्रकरणात खंडपीठाने चौकशीचे आदेश दिले होते. मात्र, त्यानंतरही चौकशीत निष्काळजीपणा केल्याचा ठपका ठेवत जिल्हाधिकारी रवींद्र जगताप यांची बदली करण्याचे आदेश मुंबई उच्च न्यायालयाच्या औरंगाबाद खंडपीठाचे न्यायमूर्ती रवींद्र घुगे व न्यायमूर्ती एस. जी. मेहारे यांनी दिले आहेत.

बीड जिल्ह्यात वर्ष २०११ ते २०१९ या कालावधीत नरेगामध्ये मोठ्या प्रमाणावर घोटाळा झाल्याप्रकरणी राजकुमार देशमुख यांनी याचिका दाखल केली होती. या प्रकरणात २१ जानेवारी २०२१ रोजी खंडपीठाने सखोल चौकशी करून कारवाई करण्याचे आदेश जिल्हाधिकाऱ्यांना दिले होते. मात्र प्रत्यक्षात कारवाई झाली नाही. त्यानंतर २५ जूनरोजी जिल्हाधिकाऱ्यांनी शपथपत्र दाखल करून चौकशी समिती नेमल्याचे न्यायालयात सांगितले. त्यानंतर नुकत्याच झालेल्या सुनावणीत जिल्हाधिकारी यांनी दाखल केलेल्या शपथपत्रानंतर खंडपीठाने नाराजी व्यक्त केली.

जिल्हाधिकारी जगताप यांच्या कार्यकाळात चौकशी होईल असे वाटत नाही, म्हणूनच त्यांची मुख्य सचिवांनी तातडीने बदली करावी, असे आदेश दिले. या प्रकरणाच्या अनुषंगाने नवीन जिल्हाधिकाऱ्यांना नवीन सूचना देण्यात येतील असेही खंडपीठाने स्पष्ट केले. या प्रकरणाची पुढील सुनावणी १८ ऑगस्ट रोजी ठेवण्यात आली आहे. याचिकाकर्त्यांतर्फे गिरीश थिगळे (नाईक) यांनी काम पाहिले.