हिंगोली : येथील जिल्हा परिषदेत राष्ट्रवादीच्याच सदस्यांनी राष्ट्रवादीच्या शिक्षण सभापती विरोधात बुधवारी (ता. नऊ) ३५ विरुध्द शुन्य मतांनी अविश्वास ठराव पारित केला आहे. यावेळी १५ सदस्य गैरहजर राहिले होते.

हिंगोली जिल्हा परिषदेत ५२ सदस्य असून त्यापैकी दोन जागा रिक्त आहेत. जिल्हा परिषदेत राष्ट्रवादी, शिवसेना. काँग्रेस आघाडीची सत्ता आहे. मागील काही दिवसांपुर्वीच जिल्हा परिषदेचे अध्यक्ष व उपाध्यक्षपदाच्या निवडीनंतर जानेवारी २०२० मध्ये सभापतीपदासाठी निवड झाली होती. त्यानंतर जुलै २०२० रोजी शिक्षण सभापतीपद राष्ट्रवादीच्या रत्नामाला चव्हाण यांच्याकडे देण्यात आले होते. तर कृषी सभापतीपद काँग्रेसचे बाजीराव जुमडे यांना देण्यात आले होते. शिक्षण सभापतीचा पदभार घेतल्यानंतर रत्नमाला चव्हाण यांनी सदस्यांना विश्वासात न घेता कामे करणे यासह इतर आरोप केले जात होते. नंतर राष्ट्रवादीच्याच सदस्यांनी त्यांच्यावर अविश्वास ठराव आणण्यासाठी पुढाकार घेतला. यामध्ये शिवसेना व काँग्रेसच्या सदस्यांनी देखील मदत केली होती.

हेही वाचा - उमरखेडच्या कुटीर रुग्णालयाचे उपजिल्हा रुग्णालयात रुपांतर- हेमंत पाटील

बुधवारी (ता. नऊ) अविश्वास ठरावावर चर्चा करण्यासाठी उपविभागीय अधिकारी अतुल चोरमारे यांच्या उपस्थितीत जिल्हा नियोजन समितीच्या सभागृहात सदस्यांची बैठक झाली. यावेळी उपमुख्य कार्यकारी अधिकारी धनवंतकुमार माळी उपस्थित होते. यावेळी सभागृहात ३५ सदस्यांची उपस्थिती होती. यामध्ये शिवसेनेचे ११, काँग्रेसचे १०, राष्ट्रवादीचे १०, दोन अपक्ष तर दोन भाजपाच्या सदस्यांच्या समावेश होता. यावेळी झालेल्या चर्चेत उपस्थित असलेल्या ३५ सदस्यांनी विश्वास ठरावाच्या बाजूने मतदान केले. त्यामुळे अविश्वास ठराव ३५ विरुध्द शुन्य मतांनी पारित झाला आहे. या मुळे राजकीय चर्चेला उधाण आले होते.

संपादन- प्रल्हाद कांबळे