आखाडा बाळापूर : येथे आमदार संतोष बांगर यांचा नागरी सत्कार करण्यात आला; तसेच त्यांच्या विकास निधीतून मंजूर झालेल्या १३ कोटी ५० लाख रुपयांच्या विकासकामांचे भूमिपूजन मंगळवारी (ता. २८) आमदार संतोष बांगर यांच्या हस्ते करण्यात आले.

कार्यक्रमाच्या अध्यक्षस्थानी सरपंच भीमाबाई नरवाडे होत्या. माजी शिक्षण सभापती संजय बोढारे, मोहनसिंग बायस, राजेश्वर पतंगे, राजेंद्र शिखरे, धनंजय पाटील सूर्यवंशी, विजय पाटील बोढारे, सचिन पेंढारकर, रामभाऊ कदम, रुहुलाखा देशमुख, बाजीराव सवडकर, पप्पू पाटील अडकिने, शिवा उघडे, शेषराव बोढारे, संदीप नरवाडे यांच्यासह परिसरातील नेते उपस्थित होते. कार्यक्रमाचे आयोजक कृषी उत्पन्न बाजार समितीचे सभापती दत्ता पाटील बोंढारे यांनी केले होते.

यावेळी आमदार बांगर म्हणाले, ‘‘आमचा ध्यास फक्त विकास कामे करायचा आहे. आम्हाला माघारी कोण काय म्हणतो याकडे मी लक्ष देत नाही. आम्ही फक्त विकास कामाकरिता निधी आणतो; कारण लोकसभेचा खासदार आमदार जिल्हा परिषद अध्यक्ष सभापती बाळापूरचा सरपंच हे सर्व आपले आहेत. शिवसेनेचे आहेत. यामुळे आपण कोणाच्याही टीकेला भीक घालत नसून केवळ विकासकामे करण्याकरिता अग्रेसर आहे’’, असे ते म्हणाले.