हिंगोली : जिल्हा परिषद व पंचायत समिती सार्वत्रिक निवडणूक- २०२२ निमित्त प्रारूप प्रभाग रचना जाहीर करण्यात आली आहे. या अनुषंगाने दोन ते आठ जून या कालावधीत आक्षेप दाखल करण्याबाबत संधी देण्यात आली होती. त्यानुसार एकूण ५९ आक्षेप दाखल झाले आहेत. यामध्ये सर्वाधिक गटासाठी ४८ तर गणासाठी ११ आक्षेप दाखल करण्यात झाले आहेत.

ता. २० मार्चला जिल्हा परिषद व पाचही पंचायत समित्यांच्या सभागृहाचा कालावधी संपल्याने सद्यःस्थितीत प्रशासकाची नियुक्ती केलेली आहे. जिल्ह्यातील ५७ जिल्हा परिषद गट आणि ११४ पंचायत समिती गणाचा प्रारूप प्रभाग रचनेचा आराखडा राज्य निवडणूक आयोगाकडे यापूर्वीच सादर करण्यात आला होता. दोन जून रोजी हा आराखडा जिल्हाधिकाऱ्यांनी जाहीर केला आहे.

यात हिंगोली जिल्ह्यातील औंढा नागनाथ पंचायत समिती अंतर्गत ४४ प्रारूप प्रभाग रचना, वसमत पंचायत समिती अंतर्गत ५७ प्रारूप प्रभाग रचना, सेनगाव पंचायत समिती अंतर्गत ३४ प्रारूप प्रभाग रचना, कळमनुरी पंचायत समिती अंतर्गत २३ प्रारूप प्रभाग रचना तर हिंगोली पंचायत समिती अंतर्गत अकरा प्रारूप प्रभाग रचना जाहीर करण्यात आली होती. या प्रारूप प्रभाग रचनेवर काही हरकती व सूचना असल्यास त्या दोन जून नंतर आठ जून या कालावधीत जिल्हाधिकारी कार्यालय येथे ग्रामपंचायत निवडणूक शाखेत सादर करण्याचे आवाहन करण्यात आले होते. तसेच प्रारूप प्रभाग रचनेचे अवलोकन सर्व संबंधितांनी करावे, अशा सूचना जिल्हाधिकारी जितेंद्र पापळकर यांनी दिल्या होत्या.

त्यानुसार जिल्हा परिषद व पंचायत समितीच्या प्रारूप प्रभाग रचनेवर एकूण ५९ आक्षेप दाखल झाले आहेत, अशी माहिती जिल्हाधिकारी जितेंद्र पापळकर यांनी प्रसिद्धी पत्रकाद्वारे दिली आहे.

तालुकानिहाय दाखल झालेले आक्षेप

तालुका गट गण एकूण

हिंगोली ४ ३ ७

कळमनुरी ११ ५ १६

सेनगाव ७ ० ७

औंढा नागनाथ १५ १ १६

वसमत ११ २ १३