वसमत : हिंगोली, परभणी आणि नांदेड या तीन जिल्ह्यांचे कार्यक्षेत्र असलेल्या पूर्णा सहकारी साखर कारखान्याचा निवडणूक कार्यक्रम बुधवारी जाहीर झाला. ९ जुलैला मतदान तर ११ जुलैला मतमोजणी होणार आहे. शुक्रवारपासून (ता. दोन) नामनिर्देशन पत्राची विक्री व दाखल करण्यास सुरुवात होणार आहे.

हिंगोलीसह नांदेड आणि परभणी या तीन जिल्ह्यांचे कार्यक्षेत्र असलेल्या वसमत येथील पूर्णा सहकारी साखर कारखान्याचा निवडणूक कार्यक्रम जाहीर झाला. उत्पादन मतदारसंघात वसमत गटात तीन जागा, चुडावा गटात दोन जागा, पूर्णा गटात तीन जागा, जवळा गटात तीन जागा, वडगाव-साडेगाव गटात तीन जागा, उत्पादक सहकारी संस्था,

बिगर उत्पादक संस्था व पणन एक जागा, अनुसूचित जाती जमाती एक जागा, महिला राखीव दोन जागा, इतर मागास प्रवर्ग एक जागा, विभक्त जाती-भटक्या जमाती व विशेष मागास प्रवर्ग एक जागा अशा एकूण २१ संचालक निवडून देण्यासाठी निवडणूक होणार आहे.

तहसील कार्यालयात २ ते ८ जून दरम्यान सकाळी ११ ते दुपारी ३ पर्यंत नामनिर्देशन पत्राची विक्री व दाखल करता येणार आहे. ९ जूनला दाखल नामनिर्देशन पत्राची छाननी होणार आहे. १२ ते २६ जून या कालावधित उमेदवारी अर्ज मागे घेता येणार आहे. २७ जूनला सकाळी ११ वाजता निवडणूक चिन्ह वाटप करण्यात येणार आहे.

९ जुलैला मतदान होणार आहे तर ११ जुलैला मतमोजणी व निकाल घोषित केला जाणार आहे. निर्वाचन अधिकारी म्हणून उपविभागीय अधिकारी डॉ. सचिन खल्लाळ, सहाय्यक निर्वाचन अधिकारी म्हणून तहसीलदार अरविंद बोळंगे, किशोर दुधमल काम पाहणार आहेत.