हिंगोली : औंढा नागनाथ तालुक्यातील पिंपळदरी येथील जिल्हा परिषद शाळेत शाळा भौतिक सुविधा उपलब्ध करण्यासाठी गावकऱ्यांची बुधवार ( ता. १० ) बैठक घेण्यात आली या बैठकीमध्ये गावातील ग्रामस्थांच्या वतीने शाळेचा कायापालट करण्यासाठी वर्गणी गोळा करण्यात आली . यामध्ये एकाच दिवसात १ लाख १० हजार रुपयाची वर्गणी शिक्षणप्रेमींच्या वतीने जमा झाली. 

शाळेत नसणाऱ्या सर्वच भौतिक गर्जा पूर्ण करण्यासाठी व विद्यार्थ्यांना चांगल्या दर्जाचे शिक्षण मिळण्यासाठी ग्रामस्थ व शिक्षण प्रेमींच्या वतीने हे पाऊल उचलण्यात आले आहे. औंढा नागनाथ तालुक्यातील पिंपळदरी येथे शाळेच्या सर्वांगीन विकासासाठी गावातील ग्रामस्थांची बैठक पिंपळदरीच्या सरपंच रत्नमाला भुरके यांच्या अध्यक्षतेखाली घेण्यात आली. गावातील शिक्षणप्रेमी मंडळी कोरोनाचे नियम पाळत  हजर होती.

यावेळी लोकवर्गणीतून शाळेचा कायापालट करण्याबाबत चर्चा झाली त्याला प्रतीसाद देत पिंपळदरीचे ग्रामस्थ अभिनंदन  धोंगडे,  संजय मेथेकर, संजय पाटील, भगवान रिठ्ठे  ग्रामपंचायतचे सरपंच, सर्व सदस्य, मुख्याध्यापक व सर्व शिक्षक,  साहेबराव  भगत,  शेख बद्रोदीन,  ग्यानदेव  रीठ्ठे, शिलाबाई  बलखंडे, रेखाबाई दशरथ भगत, शंकुतला दोडल ग्रामसेवक सुनिल मुळे आदींनी एक लाख १० हजाराची वर्गणी जमा केली. तर शिवाजी रीठे ५० रोपे देणार , बापुराव  घोंगडे  यांनी शाळेचा गेट दुरुस्त करुन बसविण्यासाठी लागणारा सर्व खर्च उचलला आहे.  आता यामुळे जिल्हा परिषदेच्या शाळेत विविध सोयी सुविधा उपलब्ध होणार असल्याने विद्यार्थी, पालक व शिक्षकातुन समाधान मानले जात आहे.

संपादन- प्रल्हाद  कांबळे