गिरगाव (हिंगोली): वसमत तालुक्यातील गिरगाव येथे विजवितरण कंपनीच्या कर्मचाऱ्यांच्या हलगर्जीपणामुळे गुरुवार (ता. २९) येथील तरुण विवाहीत महिलेचा विजेचा शॉक लागून मुत्यू झाल्याची घटना सुमारास घडली आहे. याबाबत इंजिनिअर व लाईनमन यांच्या विरुद्ध शुक्रवारी (ता. २९) कुरुंदा पोलिस ठाण्यात गुन्हा दाखल झाला आहे. मयत महिलेला एक वर्षाची चिमुकली मुलगी आहे. गिरगाव येथील पुंडलीकराव कल्याणकर यांची मुलगी सुनिता हीचा विवाह धानोरा (ता. उमरी जि नांदेड) येथील गौराजी सलगरे यांच्याशी झाला होता. काही दिवसांपासून आपले माहेर असलेल्या गिरगांव येथे कुडलीकराव कल्याणकर ह्या आपल्या वडीलांकडे राहत होती.

गुरुवारी सकाळी अकराच्या सुमारास घरावरील पत्रे उडू नये म्हणुन पत्रावरुन तारांचा ताण देण्यात आला होता. या तारांमध्ये अचानक विजप्रवाह सुरू झाला घरातून बाहेर येताना सुनिता हिचा हात त्या विद्युत प्रवाह सुरु असलेल्या तारांना स्पर्श झाल्याने विजेचा जबरदस्त शॉक लागल्याने सुनिता सलगरे हिचा जागीच मुत्यू झाला. तनाव्याच्या तारामध्ये विद्युत प्रवाह कसा काय झाला यांची घटनास्थळी उपस्थित नागरिकांनी पाहणी केली असता यामध्ये एक धक्कादायक व गंभीर बाब समोर आली. विज वितरण कंपनीकडून विजबिले न भरणा-या ग्राहकांचा वीजपुरवठा खंडित करण्याची मोहीम हाती घेतली आहे. पण ज्याची विज कनेक्शन तोडणी केली ती विजतोडणी थेट विजेच्या खांबावरून करण्याऐवजी मिटरपासून केली. त्यामुळे खांबावरून येणारा विद्युत पुरवठा सुरूच राहिला. सदरील घटना घडली त्या ठिकाणी सुद्धा हा प्रकार समोर आला.

कुरूंदा पोलिसांकडे तपास
विजेच्या खांबावरून आलेल्या सर्विस वायर मधून वीजप्रवाह झाल्याने पत्रे उडू नये म्हणून देण्यात आलेल्या पत्राच्या तणाव्यात वीजप्रवाह आला. त्या तणाव्याच्या तारांना स्पर्श झाल्याने महिलेचा मृत्यू झाला. कर्मचा-यांच्या हलगर्जीपणामुळेच महिलेला जीव गमवावा लागला दरम्यान, पुंडलिक कल्याणकर यांनी शुक्रवारी दिलेल्या फिर्यादीवरून गिरगाव सबस्टेशनचे इंजिनिअर जीवन राठोड, लाईनमन अनिल अवकाळे यांच्याविरुद्ध कुरुंदा पोलिस ठाण्यात गुन्हा दाखल करण्यात आला आहे. अधिक तपास कुरूंदा पोलिस करत आहेत.